“Albania Files” dhe Drejtësia në Provë

Sot Shqipëria gjendet në një udhëkryq historik ku nuk respektohet as ligji dhe as Kushtetuta. Por është ngritur kulti i një njeriu që e trajton vendin si çifligun e tij privat. Publikimi i të dhënave që po qarkullojnë nën emërtimin “Albania Files” nuk është thjesht një skandal i radhës; ai është radiografia e një shteti të kapur në paligjshmëri absolute. Ky dokument përbën provën e një vepre të pastër penale, ku dëshmohet se si vendoset për fatet e territorit, bregdetit dhe qyteteve tona përmes rrugëve okulte, pa garë, pa transparencë dhe në shkelje të hapur të çdo konvente ndërkombëtare.

Nëse ka një çështje që Prokuroria e Posaçme (SPAK) duhet ta sekuestrojë dhe ta hetojë me urgjencë kombëtare, ajo është pikërisht kjo dosje.

Makineria e “Arkistarëve” dhe Pastrimi Strategjik i Parave

Sipas të dhënave, skema është sa e sofistikuar në dukje, aq edhe banale në mbrojtjen ligjore që i bëhet. Përmes një rrethi të ngushtë arkitektësh të huaj të përzgjedhur me dorë (të ashtuquajturit “arkistarë”), paracaktohen projektet e kullave, resorteve dhe hoteleve luksoze. Këto projekte nuk kalojnë në filtra konkurrence, por shërbejnë si mbulesë estetike për të fshehur realitetin e zymtë: lavatriçen gjigante të pastrimit të parave të pista.

Kjo dëshmohet hapur po ashtu nga dosjet ndërkombëtare si “Aruba” dhe përgjimet e platformës së kriptuar SKY-ECC, të përgatitura nga agjencitë anti-mafia të Holandës dhe Spanjës. Këto dosje vërtetojnë se miliarda euro të rritura nga trafiku ndërkombëtar i drogës kanë gjetur strehë të sigurt në betonin e Tiranës dhe të Rivierës Shqiptare.

Paradoksi i Pushtetit: Çfarë thonë dosjet dhe çfarë pranon SPAK

Ajo që e bën situatën alarmante është institucionalizimi i këtij procesi. Kryeministri, në cilësinë e Kryetarit të Këshillit Kombëtar të Territorit (KKT) dhe Komitetit të Investimeve Strategjike, ka firmosur leje pa asnjë verifikim të rreptë të burimit të financimit.
Kontradikta publike: Ndërsa në mediat e huaja si Financial Times pretendohet se investitorët nuk janë kriminelë, në mediat vendase deklarohet hapur se “rëndësi ka të ndërtohet për të rritur ekonominë”, duke injoruar origjinën e parave.

Dëshmia e SPAK: Vetë ish- kreu i SPAK, Altin Dumani, ka deklaruar në raportimet e tij se një pjesë masive e investimeve në ndërtim dyshohet se financohen nga aktivitetet kriminale.

Nga ana tjetër, lista e përfituesve të lejeve dhe statuseve të “investitorit strategjik” lexohet si një regjistër emrash nën hetim ose të arrestuar për trafik droge dhe krim të organizuar. Kur shteti u jep kartë të bardhë këtyre subjekteve duke shkatërruar madje edhe zonat e mbrojtura natyrore, kjo nuk është më thjesht korrupsion: kjo është tradhti kombëtare ndaj interesave të vendit.

Përballë kësaj kështjelle prej betoni dhe paligjshmërie, reagimi nuk mund të jetë më thjesht pasiv.

Një apel urgjent shkon për juristët patriotë, me integritet moral dhe profesional: Ndihmoni këtë lëvizje qytetare! Është koha të bëhet gati zyrtarisht dosja e plotë “Albania Files” dhe të dorëzohet në SPAK. Ky do të ishte kontributi juaj më i madh për të rikthyer shtetin e së drejtës dhe për të nxjerrë përpara përgjegjësisë ata që e tjetërsuan Shqipërinë.

Pjesën tjetër të këtij zgjimi po e bën rruga. Qytetarët që dalin çdo ditë me vullnet të lirë dhe rinia e mrekullueshme që marshon çdo mbrëmje po tregojnë se fryma e reagimit nuk ka vdekur. Ky nuk është thjesht një protestim politik, është fillimi i revolucionit të “Shqipërisë së Re” që kërkon pastrimin e institucioneve nga oligarkia dhe krimi.

Mesazhi është i qartë, i prerë dhe i panegociueshëm: Edi Rama, jep dorëheqjen! Drejtësia duhet të bëjë punën e saj pa shikuar as lart, as majtas e as djathtas.