Dyshime për praninë pranë eskortës së Ramës

Detaje të reja janë raportuar lidhur me lëvizjet e Ergys Agasit vetëm tre ditë përpara arrestimit të tij mbrëmjen e së mërkurës, 26 gusht, në zonën e plazhit të Durrësit.

Arrestimi i Agasit, i cili ishte shpallur në kërkim nga SPAK, u konfirmua zyrtarisht nga Policia e Shtetit. Por një informacion i ri ngre pikëpyetje mbi lëvizjet e tij në ditët që i paraprinë arrestimit.

Sipas burimeve të cituara nga Timoni.al, automjeti tip Audi me të cilin Agasi u arrestua në Durrës dyshohet se është parë tre ditë më parë në zonën e Mulletit, pranë automjetit tip Toyota të përdorur nga kryeministri Edi Rama dhe makinave të eskortës policore.

Burimet pretendojnë se Audi është identifikuar përmes targës dhe se në atë kohë Agasi ndodhej duke drekuar në një restorant të zonës.

Deri më tani nuk ka një konfirmim zyrtar nga Kryeministria, Policia e Shtetit apo SPAK lidhur me këtë informacion dhe as nëse Agasi ka zhvilluar ndonjë takim gjatë kohës kur në zonë ndodhej eskorta e kryeministrit.

Pikërisht kjo rrethanë ngre pyetjen se çfarë po bënte Ergys Agasi në Mullet vetëm tre ditë përpara arrestimit dhe nëse prania e automjetit të tij pranë eskortës kryeministrore ishte rastësi apo lidhej me ndonjë takim.

Verifikimi i pamjeve të kamerave të sigurisë së restoranteve dhe bizneseve të zonës, si edhe dëshmitë e personave të pranishëm, mund të hedhin më shumë dritë mbi lëvizjet e Agasit në ato orë.

Pse ishte shpallur në kërkim Ergys Agasi?

Ergys Agasi ishte shpallur në kërkim nga SPAK që prej dhjetorit 2025, në kuadër të hetimeve për procedurat e prokurimeve pranë Agjencisë Kombëtare të Shoqërisë së Informacionit, AKSHI.

Sipas pretendimeve të organit të akuzës, Agasi dyshohet se ka pasur rol në një grup të strukturuar kriminal që ndërhynte në tendera publikë dhe favorizonte kompani të caktuara përmes presionit dhe mekanizmave të paligjshëm.

Ndaj tij janë ngritur akuza që lidhen me konkurrencën e paligjshme, shkeljen e barazisë së pjesëmarrësve në tendera, grupin e strukturuar kriminal dhe pastrimin e produkteve të veprës penale. Në dosje janë përfshirë gjithashtu edhe dyshime për heqje të paligjshme të lirisë.

Pretendimet mbeten objekt i procesit penal dhe përgjegjësia përfundimtare përcaktohet nga gjykata.