Berberi niste foto me emrat e kompanive në garë

Dalja në dritë e detajeve të reja hetimore të SPAK hedh më shumë dritë mbi dosjen që rëndon ndaj Belinda Ballukut, zëvendëskryeministre dhe ministre e pezulluar e Infrastrukturës dhe Energjisë. Hetuesit e akuzojnë atë për shkelje të barazisë në tendera, konkretisht për procedurat e Tunelit të Llogarasë dhe lotin 4 të Unazës së Madhe, me një dëm të dyshuar financiar që arrin në rreth 210 milionë euro.

Pjesë e provave është edhe këqyrja e telefonit “BlackBerry” të sekuestruar ish-drejtorit të Autoritetit Rrugor Shqiptar, Evis Berberi, në momentin e arrestimit pranverën e vitit 2024. Në këtë pajisje, në aplikacionin “Signal Private Messenger”, hetuesit kanë zbuluar shkëmbime të shumta mes Berberit dhe Miranda Shkurtit, përgjegjëse e Sektorit të Prokurimeve në ARRSH.

Një ndër komunikimet kyçe mban datën 11 gusht 2021. Berberi i shkruan Shkurtit: “Hapja e ofertave në 15 shtator, të gjitha unazat.” Shkurti i përgjigjet: “Po. Edhe po të hedhim nesër ndonjë, po në 15 shtator.” Më pas, në orën 15:14, Berberi i përcjell një tjetër mesazh: “Jo, i dua në një ditë, të gjitha të hedhura.”

Hetimi zbulon se, për secilin lot të Unazës së Madhe, Miranda Shkurti i dërgon Berberit fotografi me listën e kompanive pjesëmarrëse dhe ofertat përkatëse, duke theksuar me kursor kompaninë ose bashkimin e operatorëve ekonomikë që pritet të shpallet fitues. Sipas SPAK, këto foto më pas i kalojnë Belinda Ballukut, e cila në këtë mënyrë merr kontroll mbi procesin e tenderimit dhe fituesit e mundshëm.

Për lotin 4, i cili u fitua nga bashkimi i kompanive Pevlaku, Nova dhe Euroteorema, SPAK dyshon se fituesi është paracaktuar nga vetë Balluku. Për lotet e tjera hetimet vijojnë, ashtu siç po hetohen edhe procedura të tjera tenderuese të zhvilluara në ARRSH.