Aksident me vdekje në Nikël–Larushkë, arrestohet efektivi i policisë

Agjencia e Mbikëqyrjes Policore për Rajonin Durrës–Kavajë ka vënë në pranga në flagrancë një punonjës policie, i identifikuar me inicialet E. B., i cili ushtronte detyrën si trupë shërbimi në Patrullën e Përgjithshme të Komisariatit të Policisë Krujë. Ai dyshohet për kryerjen e veprës penale “Shkelja e rregullave të qarkullimit rrugor”, e parashikuar nga neni 290 i Kodit Penal.

Sipas njoftimit zyrtar, arrestimi u krye pas një aksidenti të rëndë rrugor të ndodhur mëngjesin e sotëm rreth orës 05:45, në aksin Nikël–Larushkë. Në momentin e ngjarjes, punonjësi i policisë po drejtonte automjetin e tij, kur u përfshi në përplasjen që rezultoi fatale për shtetasen N. Ç., e cila humbi jetën në vendin e ngjarjes.

Pas kryerjes së veprimeve të para hetimore, materialet proceduriale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, e cila pritet të vijojë me veprime të mëtejshme ligjore për zbardhjen e plotë të rrethanave të aksidentit.