Aksident i rëndë në Ksamil, humb jetën 20-vjeçari

Një aksident tragjik është shënuar mbrëmjen e sotme në zonën e Ksamilit, në vendin e njohur si “Pema e Thatë”, ku një i ri ka humbur jetën.

Sipas të dhënave paraprake, viktima është Antonio Mateli, rreth 20 vjeç, banues në Ksamil, i cili drejtonte një furgon në momentin e aksidentit. Ai nuk ka mundur t’i mbijetojë plagëve të marra dhe ka ndërruar jetë gjatë transportimit drejt spitalit.

Menjëherë pas ngjarjes, në vendin e aksidentit kanë mbërritur forca të shumta policie, të cilat kanë nisur hetimet për të zbardhur rrethanat dhe shkaqet e plota të kësaj ngjarjeje të rëndë.

Autoritetet pritet të japin në vijim informacione më të detajuara mbi dinamikën e aksidentit dhe faktorët që mund të kenë çuar në humbjen e jetës së të riut.