Aksioni ndaj emigrantëve ilegal, SPAK ekzekuton 7 masa sigurie

Një rrjet i dyshuar për organizimin e kalimit të paligjshëm të emigrantëve drejt vendeve të tjera është goditur pas një hetimi të zhvilluar nga Prokuroria e Posaçme, në bashkëpunim me Byronë Kombëtare të Hetimit, Policinë e Shtetit dhe Agjencinë e Mbikëqyrjes Policore.

Në kuadër të operacionit, në bazë të vendimit të Gjykatës së Posaçme, janë ekzekutuar masa sigurie për shtatë persona dhe janë kryer 11 kontrolle në banesa e kontrolle personale. Mes të dyshuarve janë edhe dy punonjës të Policisë Kufitare, të cilët dyshohet se kanë ndihmuar në kalimin e emigrantëve duke shfrytëzuar funksionin e tyre.

Sipas hetimeve, grupi dyshohet se organizonte hyrjen e shtetasve të huaj nga Greqia nëpërmjet kufirit të gjelbër, kryesisht në zonat e Korçës dhe Gjirokastrës. Më pas, emigrantët transportoheshin drejt veriut të Shqipërisë, me destinacion zonat e Hanit të Hotit dhe Vukpalajt, për të kaluar në Malin e Zi.

Lëvizja kryhej kundrejt pagesave monetare. Grupet e emigrantëve përbëheshin nga tre deri në 50 persona dhe shoqëroheshin nga persona që orientonin udhëtimin e tyre nëpër territorin shqiptar.

Gjashtë të dyshuar në “arrest me burg”, një në arrest shtëpie

Gjykata e Posaçme ka caktuar masën e sigurisë “Arrest në burg” për gjashtë persona, identitetet e të cilëve janë bërë të ditura vetëm me iniciale.

J. K., E. H., A. B. dhe M. Gj. dyshohen për ndihmë për kalimin e paligjshëm të kufijve, pjesëmarrje në grup të strukturuar kriminal dhe kryerje të veprave penale nga organizata kriminale.

Për dy punonjësit e policisë, V. N. dhe K. T., masa e sigurisë është caktuar për dyshimet se kanë ndihmuar në kalimin e paligjshëm të kufijve, në bashkëpunim dhe duke shfrytëzuar funksionin shtetëror.

Ndërkohë, për K. B. është caktuar masa “Arrest në shtëpi”. Ajo dyshohet për përfshirje në grupin e strukturuar kriminal dhe për ndihmë në kalimin e paligjshëm të kufijve.

Nga Korça dhe Gjirokastra drejt Malit të Zi: episodet e hetuara

Hetimi, i nisur pas një referimi nga Departamenti i Policisë Kriminale, ka dokumentuar disa raste të dyshuara të transportimit të emigrantëve gjatë vitit 2024.

• 1 maj 2024: Tre shtetas të huaj u transportuan nga zona e Mëzezit, në Tiranë, drejt Hanit të Hotit.
• 13–14 maj 2024: 21 emigrantë u lëvizën nga fshati Mashkullorë, në Gjirokastër, drejt Vukpalajt, në Malësinë e Madhe.
• 19–21 qershor 2024: 11 emigrantë u transportuan nga fshati Dardhë, në Korçë, drejt Hanit të Hotit.
• 28 qershor 2024: 17 shtetas të huaj u dërguan nga Dardha drejt Vukpalajt.
• 7 korrik 2024: U tentua transportimi i katër emigrantëve nga Korça, por drejtuesi i automjetit u arrestua në flagrancë nga policia e Korçës dhe Maliqit.
• 8–9 korrik 2024: 12 emigrantë u transportuan nga Jorgucati, në Gjirokastër, drejt Malësisë së Madhe. Sipas hetimit, në këtë rast dy punonjës të Policisë Kufitare në Shkodër dyshohet se lehtësuan kalimin e tyre drejt Malit të Zi.
• 23–24 korrik 2024: 11 emigrantë u transportuan nga Bilishti drejt Tiranës dhe më pas në Shkodër. Pasi kaluan në Malin e Zi, ata u morën peng nga pesë persona me origjinë nga Lindja e Mesme.

Për rastin e fundit, ndërhyrja në bashkëpunim me autoritetet malazeze bëri të mundur lirimin e emigrantëve dhe arrestimin e tre personave të dyshuar për pengmarrjen.

SPAK bën me dije se hetimet vijojnë për të identifikuar persona të tjerë që mund të kenë qenë pjesë e rrjetit, si në Shqipëri, ashtu edhe jashtë saj. Për personat e përfshirë në procedim, dyshimet e ngritura nga hetimi nuk përbëjnë fajësi të provuar deri në një vendim gjyqësor të formës së prerë.