Alarm për bombë në “Toptani”, boshatiset urgjent qendra tregtare

Një situatë alarmante është regjistruar mbrëmjen e sotme te Toptani Shopping Center, ku autoritetet janë vënë në lëvizje pas një sinjalizimi për kërcënim me eksploziv.

Sipas informacioneve paraprake, ndërtesa është boshatisur me shpejtësi, duke nxjerrë jashtë të gjithë qytetarët dhe stafin, menjëherë pasi është marrë një njoftim i dyshimtë. Dyshohet se paralajmërimi është dërguar në rrugë elektronike, përmes një emaili, çka ka ngritur menjëherë nivelin e gatishmërisë së strukturave të sigurisë.

Në vendngjarje kanë mbërritur forca të shumta policie, të cilat kanë izoluar perimetrin përreth, ndërsa ekipet e emergjencës po qëndrojnë në gatishmëri. Burime bëjnë me dije se pritet ndërhyrja e njësive të specializuara për të kryer kontrolle të imtësishme në ambientet e qendrës tregtare, me qëllim verifikimin e plotë të situatës dhe neutralizimin e çdo rreziku të mundshëm.

Autoritetet u bëjnë thirrje qytetarëve të shmangin zonën deri në një njoftim të dytë, ndërsa hetimet vijojnë për të zbardhur origjinën dhe seriozitetin e këtij kërcënimi.