Ambasada Britanike paralajmëron Policinë: Jo forcë ndaj studentëve!

Ambasada Britanike në Tiranë ka reaguar zyrtarisht pas përshkallëzimit të protestës studentore dhe përplasjeve të dhunshme në kryeqytet, duke kërkuar respektimin e së drejtës për protestë dhe shmangien e përdorimit joproporcional të forcës nga Policia.

Në një deklaratë të publikuar këtë të mërkurë, më 14 tetor 2026, përfaqësia diplomatike e Mbretërisë së Bashkuar thekson se liria e shprehjes dhe e drejta për protestë paqësore janë të drejta të mbrojtura nga Kushtetuta e Shqipërisë.

Megjithatë, Ambasada nënvizon se këto të drejta nuk mund të përdoren si justifikim për akte dhune apo dëmtim të pronës publike dhe private.

“E drejta për të protestuar nuk legjitimon përdorimin e dhunës apo dëmtimin e pronës publike dhe private. Sikundër, ajo nuk duhet të përballet me veprime joproporcionale nga policia”, thuhet në deklaratën e Ambasadës Britanike.

Në reagimin e saj, përfaqësia diplomatike u bën thirrje të gjitha palëve të tregojnë vetëpërmbajtje, të respektojnë të drejtat themelore dhe të kontribuojnë në uljen e tensioneve.

Deklarata vjen në një moment kur protesta studentore në Tiranë është përshkallëzuar, me përplasje mes protestuesve dhe forcave të rendit, si dhe incidente në disa institucione dhe godina në kryeqytet.