Argjentina mposht 3-1 Zvicrën dhe gjen Anglinë në gjysmëfinale

Angli–Argjentinë do të jetë një nga dy superpërballjet e gjysmëfinaleve të Kupës së Botës 2026. Kampionët në fuqi vuajtën për 120 minuta ndaj Zvicrës, por në fund triumfuan 3-1 dhe siguruan biletën për në katërshen më të mirë të turneut.

Argjentina është vetëm një ndeshje larg finales së madhe të Botërorit. Mëngjesin e kësaj të diele, me orën shqiptare, skuadra e Lionel Scalonit mposhti 3-1 Zvicrën pas kohës shtesë, në një sfidë dramatike të zhvilluar në Kansas.

Ndeshja nisi në mënyrën më të mirë për amerikano-latinët. Lionel Messi dhuroi asistin për Mac Allister, i cili me kokë dërgoi topin në rrjetë dhe kaloi Argjentinën në avantazh.

Me këtë pasim final, Messi regjistroi asistin e tij të dhjetë në Kupat e Botës, duke vendosur një tjetër rekord në historinë e kompeticionit.

Por Zvicra, me Granit Xhakën në fushë, nuk u dorëzua. Në minutën e 67-të, Ndoye realizoi një gol të bukur dhe riktheu baraspeshën, 1-1.

Vetëm pesë minuta më vonë, zviceranët mbetën me dhjetë lojtarë pas kartonit të kuq të Embolos. Vendimi për kartonin e dytë të verdhë shkaktoi protesta të forta te lojtarët e Zvicrës, me Xhakën dhe shokët e tij që kundërshtuan ashpër gjykimin.

Pavarësisht epërsisë numerike, Argjentina nuk arriti të gjente golin e fitores brenda 90 minutave dhe koha e rregullt u mbyll në barazim 1-1.

Drama vijoi në shtesë. Në minutën e 112-të, Julian Alvarez realizoi një supergol dhe kaloi sërish Argjentinën në avantazh.

Goditjen përfundimtare e dha Lautaro Martinez në minutën e 120+1, duke vulosur rezultatin 3-1 dhe kualifikimin e kampionëve të botës në gjysmëfinale.

Argjentina do të përballet më 15 korrik, në orën 21:00, me Anglinë, në një nga sfidat më të shumëpritura të këtij Botërori.

Me këtë ndeshje mbyllet edhe faza çerekfinale. Dy çiftet gjysmëfinaliste janë Francë–Spanjë dhe Angli–Argjentinë.

Kupa e Botës 2026 – Gjysmëfinalet:

14 korrik, ora 21:00 – Francë–Spanjë

15 korrik, ora 21:00 – Angli–Argjentinë

Rezultatet e çerekfinaleve:

9 korrik – Francë 2-0 Marok, Boston

10 korrik – Spanjë 2-1 Belgjikë, Los Angeles

11 korrik – Norvegji 1-2 Angli, Miami

12 korrik – Argjentinë 3-1 Zvicër, Kansas