“Aruba”/ Si u investuan paratë e kokainës në kulla dhe në resorte

Një skemë e mirëorganizuar për pastrimin e parave të përfituara nga trafiku ndërkombëtar i kokainës përmes sektorit të ndërtimit në Tiranë dhe në zonat bregdetare është goditur nga Prokuroria e Posaçme (SPAK). Hetimet kanë çuar në kërkesën për masa sigurie ndaj 20 personave, ku 15 prej tyre kërkohen në burg dhe 5 të tjerë në arrest shtëpie, mes tyre edhe emra të njohur të biznesit.

Gjatë operacionit të fundit janë vënë në pranga katër persona, ndërsa në mesin e të arrestuarve ndodhet edhe biznesmeni i ndërtimit Ilir Shtufi, i kapur në territorin e Greqisë.

Sipas materialeve hetimore, grupi i dyshuar kriminal ka zhvilluar aktivitetin e tij përgjatë viteve 2018–2021, duke organizuar takime të shpeshta jashtë Shqipërisë, përfshirë Aruba-n, Spanjën, Monakon dhe Gjermaninë. Në këto takime, sipas dosjes, janë koordinuar detaje që lidhen me trafikun e kokainës nga Amerika Latine, menaxhimin e logjistikës, si dhe investimin e fitimeve në pasuri të paluajtshme dhe projekte ndërtimi në Shqipëri.

Një rol kyç në këtë rrjet dyshohet se ka pasur biznesmeni Artur Shehu, i cili sipas hetimeve ka ndërmjetësuar lidhjet mes trafikantëve dhe investitorëve, duke ndikuar në kanalizimin e fondeve drejt projekteve ndërtimore, përfshirë kulla në kryeqytet dhe resorte turistike në bregdet.

Dosja hetimore evidenton gjithashtu komunikime të dyshuara me funksionarë të lartë shtetërorë, megjithëse pa përmendur konkretisht identitete. Sipas prokurorisë, ekziston dyshimi se projekte të caktuara ndërtimi janë mbështetur indirekt nga struktura politike, duke mundësuar integrimin e kapitalit të paligjshëm në ekonomi.

Në fazën fillestare, paratë e përfituara nga aktiviteti kriminal transportoheshin drejt Shqipërisë përmes rrjeteve informale si sistemi “Hawala”. Më pas, skema vijonte me manipulimin e pronësisë së tokave, shpesh përmes falsifikimit të dokumenteve historike, si në rastin e zonës së Zvërnecit.

Pasi sigurohej prona, ajo ndahej në parcela dhe kalonte në disa duar për të vështirësuar gjurmimin e origjinës. Në fund, këto toka përfshiheshin në projekte zhvillimi ndërtimor, duke përzier kështu kapitalin e paligjshëm me investime formalisht të ligjshme.

Prokuroria ka identifikuar këtë mekanizëm në disa projekte konkrete, përfshirë një kullë në Tiranë dhe komplekse vilash në zonën e Palasës. Gjithashtu, hetimet kanë nxjerrë në pah manipulime të shumta me pronat në bregdet, duke ngritur dyshime të forta për pastrim parash në shkallë të gjerë.

Në fokus të hetimeve është edhe një projekt në Zvërnec, ku dyshohet se toka është përfituar përmes falsifikimit të dokumenteve dhe më pas është transferuar në mënyrë të paligjshme tek persona të lidhur me rrjetin.

Në këtë kuadër, Gjykata e Posaçme kundër Korrupsionit dhe Krimit të Organizuar (GJKKO) ka vendosur sekuestrimin preventiv të rreth 128 milionë eurove, të lidhura me transaksione të kompanisë “Albania Land Development”. Kjo shoqëri administrohet nga Redi Struga dhe është në pronësi të vëllezërve Al Khayyat nga Katari.

Hetimet vijojnë për të dokumentuar plotësisht rrjetin e përfshirë, rrjedhën e parave dhe përgjegjësitë individuale në një nga dosjet më të rëndësishme që lidhen me pastrimin e parave përmes sektorit të ndërtimit në Shqipëri.