Balla nxjerr sheshit ‘të palarat’ e Shehajt: Hallin e tij e di gjithë Vlora!

Kreu i grupit parlamentar të Partisë Socialiste, Taulant Balla, ka hedhur akuza të forta ndaj Agron Shehajt, duke deklaruar se shqetësimi i tij nuk lidhet me protestat, por me çështje që sipas Ballës kanë të bëjnë me të afërmit e tij në Vlorë.

Gjatë fjalës së tij, Balla përmendi konkretisht Agim Shehajn, të cilin e identifikoi si djalin e xhaxhait të Agron Shehajt, duke pretenduar se ai është përfshirë në manipulimin e pronave dhe se ndodhet nën hetim.

“Ky Agron Shehaj që po bërtet, ky s’ka lidhje me protestën, halli është djali i xhaxhait, Agim Shehaj, që është një nga personat që ka manipuluar pronat atje dhe është në hetim. E di gjithë Vlora sa hektarë tokë ka Agim Shehaj, të sfidoj të shkojmë në Vlorë dhe të sqarojmë Vlorën për hallet që ke ti dhe Agim Shehaj. Të besuan regjistrin e partisë dhe atë e vodhe, këtë më tha Luli”, tha Balla.

Deklaratat e kreut të grupit socialist vijnë në kuadër të përplasjeve politike mes mazhorancës dhe opozitës, ndërsa deri tani nuk ka pasur një reagim publik nga Agron Shehaj lidhur me akuzat e ngritura ndaj tij dhe familjarit të tij.