Balluku në Zvicër, komentuesit: Rri andej me Tigrin, ka eksperiencë

Vetëm pak orë pasi në media u publikua lajmi se ndaj saj është hapur një hetim nga SPAK, zëvendëskryeministrja dhe ministrja e Infrastrukturës, Belinda Balluku, u shfaq sërish në publik, këtë herë nga Zvicra.

Në rrjetet e saj sociale, Balluku postoi një video ku shihet e qetë dhe e buzëqeshur gjatë një udhëtimi me tren nga Zyrihu drejt Bernës, duke folur për projekte infrastrukturore dhe për modelin e hekurudhave që po kërkon të adaptojë edhe Shqipëria.

Por ndërsa videoja kishte si synim promovimin e ideve të saj për transportin publik, komentet poshtë saj u mbushën me ironi dhe iluzione për zhvillimet e fundit.

Shumë ndjekës i kujtuan hetimet e hapura nga SPAK, ndërsa disa e krahasuan udhëtimin e saj me rastin e ish-zv.kryeministrit Arben Ahmetaj, i cili prej muajsh ndodhet në Zvicër.

“Lëri porosi Ben Tigrit të të gjejë ndonjë apartament me qira atje,” shkruan një komentues, ndërsa një tjetër ironizon: “Shko tako Tigrin, ka eksperiencë me rrugët e Zvicrës.”

Mes dhjetëra reagimeve nuk munguan edhe komentet që përmendnin hetimin ndaj saj, si:

“Nesër je e ftuar në SPAK,”
“A ke dëgjuar çfarë po gatuhet në Tiranë?”
“Rri andej me Ahmetajn, ndoshta është më e qetë.”

Megjithë notat ironike të ndjekësve, ministrja nuk ka reaguar deri tani për çështjen e hetimit apo për komentet e bëra në adresë të saj.