Belgët ‘zbërthejnë’ dosjen e ‘Cinco’-s dhe mesazhin për Edi Ramën

Nga një emër i njohur i jetës së natës në Shqipëri, Ermir Ndreaj, i njohur me nofkën “Cinco”, është kthyer në një nga personazhet e dosjeve të mëdha të trafikut ndërkombëtar të kokainës në Belgjikë.

Media belge “Het Laatste Nieuws” ka rikonstruktuar historinë e Ndreajt dhe mënyrën se si, sipas dosjeve hetimore dhe prokurorisë belge, ai dyshohet se kishte një rol të rëndësishëm në organizimin e operacioneve të trafikut të drogës.

Nga komunikimet e sekuestruara dalin në pah shuma marramendëse parash, laboratorë për përpunimin e kokainës, ngarkesa që udhëtonin nga Ekuadori drejt Europës dhe një stil jetese luksoz.

Në një prej komunikimeve të përfshira në dosje, Ndreaj diskuton edhe për investime në vlera miliona euro dhe përmend në llogaritjet e tij edhe kryeministrin shqiptar Edi Rama.

“Edhe kryeministri i Shqipërisë merr pjesë”, shkruante ai në një prej bisedave, pa dhënë në atë moment detaje të tjera se çfarë nënkuptonte me këtë deklaratë.

Nga biznesi i natës te rrjeti i kokainës

Sipas prokurorisë belge, Ndreaj nuk kishte rolin e një ekzekutuesi të thjeshtë. Hetuesit e përshkruajnë si një prej personave që merrej me organizimin e transporteve, gjetjen e magazinave, koordinimin e njerëzve dhe ndërhyrjen në situata kur operacionet rrezikonin të dështonin.

Një episod i vitit 2020 tregon mënyrën se si funksiononte kjo strukturë.

Më 15 shtator 2020, një ngarkesë që në dokumente paraqitej si transport ushqimor kishte mbërritur në Belgjikë. Mijëra kanaçe me ton ishin transportuar nga Ekuadori, përmes Antwerp-it, drejt një kompanie ushqimore në Holandë.

Në realitet, sipas dosjes gjyqësore, në një pjesë të ngarkesës ishte fshehur pastë kokaine.

Ngarkesa u dërgua më pas drejt një magazine në Heirbaan, në Beveren-Melsele. Atje u shkarkuan 796 kuti, që përmbanin gjithsej 38.016 kanaçe me ton.

Sipas dosjes, në 141 prej kutive ishte fshehur pasta e kokainës.

Në orën 18:34, Ndreaj njoftoi se transporti kishte mbërritur. Pak minuta më vonë nisën kontrollet dhe hapja e kanaçeve.

Në hapësirën mbi magazinë, kutitë ishin grumbulluar deri në mure. Pesë persona nisën të kontrollonin ngarkesën, ndërsa qëllimi nuk ishte përmbajtja ushqimore, por nxjerrja e drogës së fshehur brenda kanaçeve.

Operacioni me një hapëse kanaçesh

Fillimi i operacionit ishte thuajse absurd për përmasat e ngarkesës.

Personat që merreshin me nxjerrjen e drogës kishin vetëm një hapëse të zakonshme kanaçesh. Kanaçet hapeshin njëra pas tjetrës me dorë, duke e bërë procesin jashtëzakonisht të ngadaltë.

Për të përshpejtuar punën u siguruan hapëse të tjera, ndërsa u soll edhe një dyshek që punëtorët të mund të pushonin gjatë operacionit.

Kur njëri grup lodhej, zëvendësohej nga të tjerë.

Ndreaj, sipas dosjes, ishte gjithnjë në komunikim për ecurinë e operacionit. Një ditë më vonë, situata u tensionua.

Rreth orës 20:30, personat në magazinë vunë re lëvizje dhe drita në objektet përreth. Dyshimi se mund të bëhej fjalë për policinë shkaktoi alarm.

Telefonatat nisën menjëherë. U dha urdhri që ngarkesa të largohej sa më shpejt.

Sipas dosjes, boshnjaku Sani Al Murdaa, i njohur me pseudonimin “Shade”, ishte i alarmuar. Një bashkëpunëtor u nis drejt Melsele-s për të ndërhyrë.

Situata u qetësua, por episodi tregoi rolin e Ndreajt. Ai nuk ishte personi që merrej drejtpërdrejt me kanaçet. Sipas akuzës, funksioni i tij ishte të koordinonte dhe të zgjidhte problemet kur operacioni dilte nga plani.

Të nesërmen, për të përshpejtuar procesin, u siguruan tre hapëse elektrike industriale.

“30 milionë euro mall”

Në komunikimet e zbuluara, Ndreaj shfaqet si një person që ndiqte nga afër çdo hallkë të operacionit.

Kur një transport vonohej, ai kërkonte informacion dhe ndërhynte për të gjetur zgjidhje.

Në një mesazh të dërguar përmes Sky ECC, ai shkruante se nuk po flinte për shkak të situatës.

Në një tjetër komunikim shpjegonte arsyen e shqetësimit:

“Kemi 30 milionë mall në duar, duhet ta largojmë sa më shpejt.”

Sipas prokurorisë federale belge, kjo mënyrë komunikimi tregonte një rol më të rëndësishëm se ai i një pjesëtari të zakonshëm të grupit.

“Ai është një person shumë dinak”, citohet të ketë deklaruar prokuroria federale, duke argumentuar se Ndreaj kontrollonte vazhdimisht situatën dhe kërkonte zgjidhje kur diçka nuk shkonte sipas planit.

Në komunikimet me bashkëpunëtorët, ai përdorte shpesh një gjuhë informale, duke iu drejtuar të tjerëve me “bro”, “vëlla” apo “vëllai im”. Megjithatë, pas kësaj mënyre komunikimi, hetuesit kanë evidentuar një strukturë të qartë rolesh dhe përgjegjësish.

Kush është “Cinco”?

Ermir Ndreaj njihej prej vitesh në Shqipëri me pseudonimin “Cinco”, emër që lidhet me aktivitetin e tij në jetën e natës.

Ai kishte lidhje me klubin Cinco Cavalli në Durrës, ndërsa emri i tij është shfaqur edhe në aktivitete të tjera biznesi në Shqipëri dhe Belgjikë.

Ndreaj është me origjinë nga Bajram Curri dhe kishte krijuar profil publik si biznesmen në fushën e hotelerisë, argëtimit dhe estetikës.

Për një periudhë ai jetoi në Belgjikë me partneren e tij dhe ishte i lidhur me Clinique Cinq, një aktivitet në sektorin e bukurisë.

Nga jashtë, profili i tij ishte ai i një biznesmeni të suksesshëm. Por komunikimet e përfshira në dosjet belge paraqesin një tjetër realitet, ku diskutoheshin shuma të mëdha parash, transportet e drogës dhe investime me vlera miliona euro.

Investimet dhe përmendja e Ramës

Një prej pjesëve më të debatueshme të komunikimeve lidhet me mënyrën se si Ndreaj fliste për investimet.

Në një bisedë me Sani Al Murdaa-n, ai diskutonte për blerjen e një hoteli dhe pronave përreth tij.

Vlera e investimit, sipas llogaritjeve të tij, arrinte rreth 15 milionë euro.

Ndreaj parashikonte se brenda tre vitesh prona mund të shumëfishonte vlerën.

Në fund të bisedës ai shkruante: “të gjitha zyrtarisht”.

Në të njëjtin kontekst, ai shtonte: “Edhe kryeministri i Shqipërisë merr pjesë”.

Nga materiali i paraqitur nuk rezulton një shpjegim i mëtejshëm në atë komunikim se çfarë nënkuptonte Ndreaj me përmendjen e kryeministrit Rama.

Si u identifikua “Cinco”

Një moment vendimtar për hetuesit ishte thyerja e komunikimeve të platformës Sky ECC në vitin 2021.

Pas aksesit në komunikimet e përdoruesve, autoritetet nisën të analizojnë llogaritë që dyshoheshin se përdoreshin nga personat e përfshirë në rrjetet e trafikut të drogës.

Një prej tyre iu atribua më vonë Ermir Ndreajt.

Identifikimi, sipas dosjes, nuk u bazua në një të dhënë të vetme. Hetuesit analizuan një seri komunikimesh dhe elementesh që lidhnin përdoruesin me Ndreajn.

Në një rast, nga llogaria u dërgua një dokument gjyqësor që mbante emrin e tij.

Në një tjetër komunikim ishte shpërndarë një artikull mediatik ku përmendej pseudonimi “Cinco”.

Përdoruesi reagoi duke shkruar:

“Po bro, por nuk është normale. Pse më kanë futur mua në gazetë bashkë me atë kokëmadhi? Çfarë lidhjeje kam unë me të? Asgjë.”

Hetuesit morën në konsideratë edhe të dhëna të tjera personale.

Një prej tyre lidhej me një orë Richard Mille, për të cilën përdoruesi i llogarisë kishte pretenduar se ishte vjedhur në Barcelonë. Hetuesit e lidhën këtë episod me një orë të Ndreajt me vlerë rreth 200 mijë euro.

Në dosje janë përdorur edhe komunikime të pretenduara me avokatin e tij, Walter Damen, për të mbështetur identifikimin e përdoruesit të llogarisë.

Mbrojtja, megjithatë, ka kundërshtuar mënyrën se si janë përdorur këto komunikime për identifikimin e Ndreajt.

225 kilogramë kokainë në laborator

Dosja “Kookwas” nxjerr në pah përmasat e rrjetit dhe operacioneve të përshkruara nga autoritetet belge.

Sipas materialeve të çështjes, të paktën tre transportime me ton mbërritën në Belgjikë përmes Antwerp-it.

Pas nxjerrjes së substancës nga kanaçet, kokaina dërgohej për përpunim të mëtejshëm.

Një problem që u shfaq gjatë operacionit ishte cilësia e produktit. Sipas dosjes, disa klientë kishin nisur të kthenin ngarkesa dhe Ndreaj kërkoi persona që merreshin me përpunimin e kokainës në Holandë për të gjetur një zgjidhje.

Hetimet zbuluan gjithashtu laboratorë ku substanca përpunohej dhe pastrohej.

Në qershor 2021, policia zbuloi në Marcinelle një laborator me sipërfaqe rreth 550 metra katrorë.

Sipas përllogaritjeve të dosjes, nga një prej ngarkesave u nxorën rreth 225 kilogramë kokainë.

Në total, nga tre transportimet mund të jenë prodhuar rreth 550 kilogramë kokainë, me një vlerë të përllogaritur rreth 16.5 milionë euro, bazuar në një çmim prej 30 mijë eurosh për kilogram.

Dënimet në Belgjikë dhe hetimi në Shqipëri

Çështjet gjyqësore ndaj Ndreajt në Belgjikë u shtuan në vitet e fundit.

Në fund të qershorit 2025, ai u dënua me 6 vite burg në çështjen “Frank de Tank”. Pak kohë më pas mori edhe një dënim tjetër prej 7 vitesh në një çështje të lidhur me trafikun e drogës.

Në shkurt 2026, ndaj tij u dha një tjetër dënim, këtë herë me 12 vite burg, për rolin e pretenduar në çështjen “Kookwas”.

Në këtë periudhë, Ndreaj nuk ndodhej në një burg belg. Ai ishte arrestuar në Shqipëri në korrik 2025, në kuadër të një hetimi të SPAK.

Më vonë ai kërkoi ndryshimin e masës së sigurisë për shkak të problemeve shëndetësore, por Gjykata e Posaçme nuk e pranoi kërkesën. Sipas raportimeve të mediave shqiptare, në atë periudhë ai ndodhej në spitalin e burgut.

Hetimi në Shqipëri vijoi dhe më 8 korrik 2026 SPAK dërgoi për gjykim dosjen ndaj 15 të pandehurve.

Ndreaj lidhet nga prokuroria shqiptare edhe me një episod droge në Guayaquil të Ekuadorit. Sipas SPAK, dosja në tërësi lidhet me 8.126 kilogramë drogë, prej të cilave 7.261 kilogramë dyshohet se ishin kokainë.

Aktualisht, Ndreaj ndodhet në burg në Shqipëri.

Mbrojtja mohon akuzat

Ndreaj i mohon akuzat për përfshirje në trafikun e drogës dhe ka apeluar vendimet e dhëna nga drejtësia belge.

Avokati i tij, Walter Damen, ka deklaruar se klienti i tij është shpallur i pafajshëm në tre raste dhe se, sipas mbrojtjes, nuk ekzistojnë prova të mjaftueshme që të vërtetojnë përfshirjen e tij në veprat për të cilat është dënuar.

Mbrojtja ka vënë në dyshim edhe deklarimet e disa personave të përdorur si prova, duke pretenduar se ata kanë dhënë dëshmi kundër Ndreajt nën presion dhe më pas i kanë tërhequr ato gjatë marrjes në pyetje ose në proceset gjyqësore.

Për çështjen shqiptare, Damen ka kritikuar gjithashtu mënyrën se si SPAK ka përdorur materialet nga hetimi belg.

Sipas tij, autoritetet shqiptare janë mbështetur në një pjesë të kufizuar të informacionit të ardhur nga dosja belge dhe nuk kanë marrë në konsideratë të gjithë materialin, përfshirë elementet që, sipas mbrojtjes, janë në favor të klientit të tij.

Mbrojtja thotë se do të vijojë betejën ligjore në fazat e ardhshme të procesit, duke argumentuar se të drejtat e Ndreajt duhet të respektohen gjatë procedurave të apelit.

Artikulli i Het Laatste Nieuws: 

Për një periudhë, ai jetoi në Britsenlei me partneren e tij Elira, me të cilën kishte edhe sallonin e bukurisë Clinique Cinq. Në Shqipëri kishte një klub nate. Ermir Ndreaj 44 vjeç dukej në çdo aspekt si një biznesmen i suksesshëm, madje kishte edhe një orë me vlerë 200 mijë euro.

Por “Cinco” ishte gjithashtu personi që telefonohej sa herë që një transport, një magazinë apo një ngarkesë droge rrezikonte të dështonte.

“Kemi 30 milionë euro mall në duar, duhet ta largojmë sa më shpejt të jetë e mundur.”Si funksiononte biznesmeni në botën e krimit dhe pse do të pendohet që humbi orën e tij?

Ishte e martë, 15 shtator 2020. Koha ishte e kufizuar. Çdo vonesë kushtonte para dhe çdo gabim mund të ekspozonte ngarkesën. Mesazhi vinte nga Ermir Ndreaj, i njohur me pseudonimin “Cinco”.

Me disa udhëzime të shkurtra, ai organizonte gjithçka që nevojitej: një faturë që transportit t’i jepej një pamje ligjore, një shofer që nuk dinte asgjë dhe dikush “nga tanët” që do të shoqëronte ngarkesën për t’u siguruar se ajo do të përfundonte në vendin e duhur.

Ngarkesa ishte ajo që më vonë u quajt “kokaina e tonit”. Mijëra kanaçe me ton ishin transportuar nga Ekuadori përmes Antwerp-it drejt një kompanie ushqimore holandeze. Tani, qindra kuti duhej të dërgoheshin në një magazinë në Heirbaan, në Beveren-Melsele.

Në dokumente bëhej fjalë për një ngarkesë të zakonshme ushqimore. Në realitet, sipas dosjes gjyqësore, në një pjesë të kanaçeve ishte fshehur pastë kokaine. Në orën 18:34, Ndreaj njoftoi se transporti kishte mbërritur. Në magazinë u shkarkuan 796 kuti, me gjithsej 38.016 kanaçe ton.

Sipas dosjes, në 141 prej këtyre kutive ishte fshehur pasta e kokainës. Në orën 19:22, Cinco mori një foto të paletave. Vetëm shtatë minuta më vonë u hapën kanaçet e para.

Në papafingon mbi magazinë, kutitë ishin vendosur deri në mure. Mes mbetjeve të yndyrshme të peshkut dhe pirgjeve me konserva, pesë burra kërkonin atë që në të vërtetë kishte rëndësi.

Peshku nuk i interesonte askujt. Ajo që duhej nxjerrë ishte pasta e kokainës. Urdhri ishte i thjeshtë: gjithçka duhej hapur dhe sa më shpejt të ishte e mundur.

Vetëm një hapëse kanaçesh

Operacioni nisi në një mënyrë thuajse amatore. “Djemtë” kishin vetëm një hapëse të zakonshme kanaçesh. Kanaçe pas kanaçeje, i hapnin me dorë. Puna ecte jashtëzakonisht ngadalë. U blenë hapëse të tjera dhe madje edhe një dyshek, në mënyrë që burrat të mund të pushonin gjatë punës.

Kur punëtorët lodheshin, zëvendësoheshin me të tjerë. Por për Cinco-n, gjithçka përsëri po ecte shumë ngadalë. Një ditë më vonë, situata ndryshoi papritur.

Rreth orës 20:30, dikush vuri re njerëz që lëviznin dhe drita të ndezura në magazinat poshtë tyre.

A ishte policia? Filluan telefonatat. Njerëzit shanin. Gjithçka duhej larguar. Menjëherë. Burrat telefonuan Ndreajn. Sipas dosjes, shefi i tij, boshnjaku Sani Al Murdaa, i njohur si “Shade”, ishte krejtësisht i alarmuar.

Në grupin e komunikimit u dha urdhri që gjithçka të zhdukej menjëherë. Një bashkëpunëtor u nis “si i çmendur” drejt Melsele-s. Në fund, kriza u tejkalua. Të nesërmen në mëngjes, Cinco siguroi tre hapëse industriale elektrike për kanaçet.

Pikërisht këto orë tregojnë rolin që luante Ndreaj. Ai nuk ishte mes mbetjeve të tonit. Nuk ishte ai që hapte kanaçet. Ai ishte personi që telefonohej kur puna ndalonte ose kur operacioni rrezikonte të dilte jashtë kontrollit.

Sipas prokurorisë federale, Ndreaj nuk ishte një ushtar i thjeshtë, por krahu i djathtë dhe personi i besuar i boshnjakut Sani Al Murdaa, një bos i njohur i drogës me një rrjet ndërkombëtar dhe një nga figurat kryesore të dosjes “Kookwas”.

Al Murdaa merrej me linjat ndërkombëtare dhe kontaktet me furnizuesit. Cinco duhej të garantonte që operacioni në Belgjikë të funksiononte: organizonte transportet, gjente magazina, drejtonte njerëzit, shpërndante paratë dhe zgjidhte situatat e krizës.

“Ai është një person shumë dinak”, tha prokuroria federale. “Ai kontrollon dhe rikontrollon gjithçka dhe, nëse diçka shkon keq, fillon vetë të hetojë, me orë dhe ditë të tëra, derisa gjen një zgjidhje.”

Toni informal

Mesazhet e tij tregojnë pikërisht këtë. Kur një operacion vonohej, Ndreaj i shkruante një bashkëpunëtori përmes Sky ECC: “As nuk fle.”

Pak më vonë shpjegonte arsyen: “Kemi 30 milionë mall në duar, duhet ta largojmë sa më shpejt.”

Stresi ishte i dukshëm, por ai nuk rrinte duarkryq. Reagimi i tij ishte gjithmonë i njëjtë: mblidhte informacion, aktivizonte njerëzit dhe përpiqej të rikthente kontrollin.

Toni i tij me njerëzit përreth ishte shpesh tepër informal. Fjalët “bro”, “vëlla” dhe “vëllai im” përsëriteshin vazhdimisht në biseda. Por pas kësaj gjuhe miqësore fshihej një ndarje e qartë rolesh. Secili kishte funksionin e tij, secili duhej të bënte pjesën e vet dhe në fund gjithçka rrotullohej rreth një gjëje: parave.

Në botën kriminale, Ermir Ndreaj njihej prej vitesh si “Cinco”.

Pseudonimi nuk vinte nga ndonjë dosje penale, por nga jeta e natës shqiptare. Cinco Cavalli ishte klubi në Durrës me të cilin emri i tij u lidh për vite me radhë. Sipas të dhënave të bizneseve shqiptare, Ndreaj shiti pjesën e tij në Cinco Cavalli në vitin 2018. Por pseudonimi mbeti.

Ndreaj është me origjinë nga Bajram Curri, në veriun e Shqipërisë, por reputacionin publik e ndërtoi kryesisht si biznesmen në fushën e hotelerisë, jetës së natës dhe estetikës. Emri i tij u lidh me Cinco Cavalli në Durrës, Savoy Garden në Tiranë dhe Clinique Cinq në Antwerp dhe Tiranë.

Për një periudhë, Ndreaj jetoi në Britsenlei me partneren e tij nga Genti, Elira B. Në vitin 2020 u themelua Clinique Cinq, një sallon bukurie ku ai ishte i përfshirë sipas të dhënave të bizneseve dhe që më vonë falimentoi.

Ndërkohë, Elira drejton në emrin e saj një sallon në Tiranë. Sipas mediave shqiptare, ata janë ende të martuar. Nga jashtë, ai dukej kryesisht si një biznesmen. Por në komunikimet e përgjuara shfaqet një botë tjetër, ku qarkullojnë miliona euro dhe ku vazhdimisht bëhen llogari për investime dhe fitime.

Jeta luksoze

Prokuroria federale e përshkruan jetën e Ndreajt pas largimit nga Belgjika si një “jetë luksoze”, me avionë privatë, veshje të shtrenjta, udhëtime luksoze dhe orë të kushtueshme. Por më interesante se lista e luksit është mënyra se si vetë Ndreaj fliste për pasurinë.

Në një bisedë me Al Murdaa-n, ai bënte llogaritje për blerjen e një hoteli dhe pronave përreth tij. Investimi total, sipas tij, do të shkonte rreth 15 milionë euro. Ndreaj mendonte menjëherë për të ardhmen: brenda tre vitesh, sipas tij, prona mund të trefishonte vlerën.

Dhe më pas shkruante: “të gjitha zyrtarisht”.

Në fund bënte një deklaratë të habitshme: “Edhe kryeministri i Shqipërisë merr pjesë.”

Kjo tregon se paratë për Cinco-n nuk shërbenin vetëm për të financuar një jetë luksoze. Ai mendonte për investime, kthim të kapitalit dhe krijimin e një pasurie që do të rritej vit pas viti.

Ndërkohë, emri i tij u shfaq edhe në dosje të tjera të trafikut të kokainës në Antwerp dhe në kontakte me persona nga qarqe të ndryshme kriminale, nga rrethi i Nordin El H., i njohur si “Dikke Nordin”, deri te anëtarë të klanit asirian Y.

Si e tradhtoi veten Cinco

Në mars 2021 gjithçka ndryshoi. Pas thyerjes së Sky ECC, hetuesit mundën të lexonin komunikimet e personave të dyshuar si figura kyçe të trafikut ndërkombëtar të drogës. Edhe një llogari që më vonë do t’i atribuohej Ermir Ndreajt u vu nën vëzhgim.

Sipas dosjes, identifikimi i tij nuk u mbështet në një mesazh të vetëm, por në një seri gjurmësh. Në një moment, nga kjo llogari u dërgua një dokument gjyqësor në emër të Ndreajt.

Në një rast tjetër, përdoruesi shpërndau një artikull gazete për çështjen e “Frank de Tank”, ku përmendej edhe emri “Cinco”.

“Po bro, por nuk është normale. Pse më kanë futur mua në gazetë bashkë me atë kokëmadhi? Çfarë lidhjeje kam unë me të? Asgjë.”

Për hetuesit, ky ishte një nga elementet që çonte drejt identifikimit të Ndreajt. Edhe orët e tij të shtrenjta ndihmuan në identifikimin e tij.

Përdoruesi i llogarisë kishte shkruar se “RM”-ja e tij ishte vjedhur në Barcelonë. Hetuesit e lidhën këtë, sipas dosjes, me vjedhjen e orës Richard Mille të Ndreajt, ku kishte ndërhyrë edhe policia spanjolle.

Më vonë u shfaqën mesazhe për një Richard Mille që kushtonte rreth 200 mijë euro. Në dosje u përdor edhe një screenshot i komunikimeve të pretenduara me avokatin e tij, Walter Damen, për të lidhur llogarinë e Sky ECC me Ndreajn. Mbrojtja më vonë e kundërshtoi përdorimin e këtyre mesazheve për identifikimin e tij.

225 kilogramë kokainë

Dosja “Kookwas” tregon përmasat e operacionit në të cilin Cinco ndihmoi të organizohej logjistika në Belgjikë.

Të paktën tre transportime me ton mbërritën në Belgjikë përmes Antwerp-it. I treti ishte pikërisht transporti i përshkruar në fillim, i cili përfundoi në Beveren-Melsele.

Më pas u shfaq një problem tjetër: cilësia e kokainës. Kokaina që nxirrej nga pasta copëtohej dhe kthehej në grimca. Klientët filluan të kthenin blloqet. Ndreaj angazhoi persona që merreshin me përpunimin e kokainës në Holandë për të gjetur një zgjidhje.

“Kookwas” përfshinte gjithashtu laboratorë industrialë ku kokaina pastrohej dhe përpunohej përsëri. Në vende të ndryshme të Belgjikës, droga përpunohej sërish. Edhe këtu, sipas dosjes, shfaqet Cinco: jo si kimist, por si “fixer” – personi që zgjidhte problemet.

Përmasat e operacionit u bënë të qarta në Marcinelle.Në qershor 2021, policia zbuloi një laborator për përpunimin e kokainës me një sipërfaqe prej rreth 550 metrash katrorë. Sipas llogaritjeve në dosje, aty u nxorën 225 kilogramë kokainë nga ngarkesa me ton.

Nga tre transportet mund të jenë nxjerrë gjithsej rreth 550 kilogramë kokainë, teorikisht me një vlerë prej 16.5 milionë eurosh, nëse llogaritet me 30 mijë euro për kilogram.

Drejtësia e gjen Cinco-n

Ndërkohë, dënimet ndaj Ndreajt në Belgjikë u shtuan. Në fund të qershorit 2025, ai u dënua me 6 vite burg në çështjen “Frank de Tank”. Një javë më vonë, mori edhe 7 vite të tjera në një tjetër çështje droge.

Në shkurt 2026, iu shtuan edhe 12 vite burg për rolin e tij në çështjen “Kookwas”. Në atë moment, megjithatë, Cinco nuk ndodhej në një burg belg. Në korrik 2025, ai ishte arrestuar në Shqipëri në kuadër të një hetimi të SPAK, Prokurorisë së Posaçme kundër Korrupsionit dhe Krimit të Organizuar.

Disa muaj më vonë, sipas medias shqiptare Zëri, ai kërkoi lirimin për shkak të problemeve shëndetësore. Gjykata e Posaçme e refuzoi kërkesën. Sipas mediave shqiptare, në atë kohë Ndreaj ndodhej në spitalin e burgut.

Edhe hetimi shqiptar vazhdoi. Më 8 korrik 2026, SPAK dërgoi në gjykatë dosjen ndaj 15 të pandehurve. Ndreaj lidhet, ndër të tjera, me një episod droge në Guayaquil, Ekuador. Sipas SPAK, dosja në tërësi lidhet me 8.126 kilogramë drogë, prej të cilave 7.261 kilogramë ishin kokainë.

Ndreaj aktualisht ndodhet në burg në Shqipëri.

Reagimi i avokatit

Ndreaj mohon se ka pasur lidhje me trafikun e drogës. Ai ka apeluar dënimet e marra në Belgjikë. Avokati i tij, Walter Damen, deklaron: “Klienti im është shpallur tre herë i pafajshëm dhe me të drejtë.”

Sipas Damen, në dosjet e tij nuk ka asnjë provë të vërtetë. Përkundrazi, ai pretendon se gjendja shëndetësore e Ndreajt nuk do t’ia kishte mundësuar kryerjen e këtyre veprave.

Avokati thotë gjithashtu se disa persona kanë dhënë deklarata kundër Ndreajt nën presion dhe më pas i kanë tërhequr ato gjatë marrjes në pyetje ose në gjykatë.

Edhe për hetimin shqiptar, Damen është kritik.

Sipas tij, SPAK ka përdorur “informacion shumë të kufizuar nga një dosje belge, pa paraqitur të gjithë dosjen dhe pa përfshirë elementet që janë në favor të klientit të tij”.

“Ne presim me durim procedurat e ardhshme të apelit dhe besojmë se aty të drejtat e mbrojtjes do të respektohen.”