Berisha me deklaratë rë fortë: Donald Lu dhe Romana Vlahutin, ambasadorët më të korruptuar në histori

Kryetari i Partisë Demokratike, Sali Berisha, ka hedhur akuza të forta ndaj ish-ambasadorëve Donald Lu dhe Romana Vlahutin, duke i quajtur ata diplomatët më të korruptuar në historinë e diplomacisë botërore. Gjatë një konference për shtyp, Berisha i akuzoi ata për mashtrim në procesin e vetingut dhe për dështimin në garantimin e një sistemi të drejtësisë funksionale në Shqipëri.

“Garancitë absolute për vetingun kanë qenë rishqyrtimi i dosjeve kriminale, por ato u hodhën poshtë. Donald Lu dhe Romana Vlahutin e bazuan procesin në një mashtrim,” deklaroi Berisha.

Ai rrëfeu një bisedë me dy ish-ambasadorët, të zhvilluar gjatë kohës kur ishte në zyrën e tij, ku ata kishin garantuar burime të kualifikuara për shqyrtimin e dosjeve të gjykatësve dhe prokurorëve. “Më thanë se kanë njerëz të kualifikuar, madje edhe nga radhët e atyre në pension. Ky ishte mashtrimi ku u mbështet gjithë procesi,” u shpreh kreu i PD.

Berisha e cilësoi procesin e vetingut si një “gjueti shtrigash,” duke përmendur raste konkrete që sipas tij tregojnë padrejtësitë e këtij sistemi.

“Një prokurore që i ati i kishte kthyer rrogën nuk u pranua, ndërsa dikush tjetër, që e ka marrë burrin dhe ka marrë para hua nga ish-bashkëshortja e tij, u pranua. Janë absurditete që nuk i gjen as në romanet e Markezit,” ironizoi Berisha.

Në përfundim, ai theksoi se procesi i vetingut ka dështuar të ofrojë një drejtësi të besueshme dhe ka shkaktuar pasoja të rënda ekonomike. “Dëmi financiar për mosgjykimin e çështjeve civile kalon mbi 4 miliardë euro. Asnjë investitor serioz nuk do të vijë në një vend ku siguria juridike është zero,” deklaroi Berisha.