Berisha thirrje Prokurorisë së BE dhe OLAF: Hetoni komunikimet Rama-Mogherini

Kreu i Partisë Demokratike, Sali Berisha, ka kërkuar nga Prokuroria Publike Europiane të hetojë e-mail-et dhe SMS-të që, sipas tij, kryeministri Edi Rama ka shkëmbyer me ish-shefën e diplomacisë europiane, Federica Mogherini, për ndërtimin e Kampusit të Kolegjit Evropian në Shqipëri.

Berisha pretendon se ekziston një marrëveshje e fshehtë midis Ramës dhe Mogherinit dhe i bën thirrje prokurorisë të hetojë gjithashtu komunikimet e tyre përmes telefonave të koduar SkyEcc dhe Matrix, të cilat sipas tij Rama i ka përdorur edhe në raste të tjera të korrupsionit ndërkombëtar.

Berisha: “Prokuroria Publike Europiane, ju bëj thirrje të hetojmë marrëveshjen e fshehtë Rama-Mogherini për ndërtimin e Kolegjit Evropian në Tiranë. Ju bëj thirrje të hetohen e-mail-et, SMS-të që Rama ka shkëmbyer me Mogherini dhe, në veçanti, komunikimet e tyre me telefona të koduar SkyEcc, Matrix, të cilat është vërtetuar se Rama i ka përdorur në raste të tjera të korrupsionit ndërkombëtar.”

Berisha shtoi se shqiptarët do të vlerësonin hetimin e lobimit që Mogherini, sipas tij, ka bërë për Ramën, për sukseset e tij imagjinare, mbulimet e megaskandaleve të tij në Bruksel dhe angazhimin e saj kundër opozitës shqiptare.