Bllokim i 4 ton produkte bimore , zbulohet sa lekë u gjobit Ylli Merja

Autoriteti Kombëtar i Ushqimit ka ndërhyrë këtë të shtunë në një magazinë në zonën e Shkozës në Tiranë, ku ka bllokuar një sasi të konsiderueshme produktesh bimore që rezultonin jashtë standardeve ligjore.

Kontrolli u ushtrua në subjektin “Merja”, në pronësi të mjekut popullor Ylli Merja, pas një denoncimi të mbërritur pranë institucionit. Gjatë inspektimit, u konstatuan plot 3984 kilogramë bimë të thata të miksuara, të ruajtura në thasë plastikë, por pa asnjë etiketim apo informacion bazë për konsumatorin.

Sipas AKU-së, produktet nuk kishin të shënuar afatin e përdorimit, origjinën apo përbërjen, duke përbërë shkelje të rëndë të rregullave të gjurmueshmërisë dhe sigurisë ushqimore.

Për këto parregullsi, inspektorët vendosën menjëherë masën e bllokimit të gjithë sasisë së gjetur në magazinë. Njëkohësisht, ndaj subjektit u vendos një gjobë prej 200 mijë lekësh për shkelje të kërkesave të gjurmueshmërisë.

Nga verifikimi i mëtejshëm i dokumentacionit rezultoi gjithashtu se mungonte sistemi i vetkontrollit, konkretisht skedat e monitorimit gjatë procesit të përpunimit dhe miksimit të bimëve. Për këtë shkelje shtesë, u vendos edhe një tjetër gjobë në vlerën 100 mijë lekë.

Autoritetet theksojnë se kontrollet do të vijojnë në të gjithë vendin, me fokus garantimin e standardeve të sigurisë për produktet që hidhen në treg.

Njoftimi i plotë i AKU-së:

Autoriteti Kombëtar i Ushqimit, referuar një denoncimi të ardhur, ka kryer kontroll në subjektin “Merja”, me adresë në lagjen Shkozë, Tiranë, ku nga inspektimi i kryer në ambientet e magazinës së subjektit, u konstatuan një sasi prej 3984 kg produkte të miksuara (miksime bimësh të thata) të ambalazhuara në thasë plastikë, por të paetiketuara, pa informacion mbi afatin e përdorimit, origjinën apo emërtimin e përbërjes.

?Mbi këto gjetje trupa inspektuese mori masën e menjëhershme të bllokimit të kësaj sasie në ambientet e magazinës si dhe për veprime, në kundërshtim me kërkesat e gjurmueshmërisë, ndaj subjektit u mor masa administrative “Gjobë” në vlerën 200,000 (dyqind mijë) lekë.

Gjithashtu nga verifikimi i dokumentacionit ka rezultuar se mungonte implementimi i sistemit te vetkontrollit (skedat e monitorimit gjatë procesit të miksimit) veprime në kundërshtim me parashikimet ligjore, për këtë mangësi u mor masa administrative “Gjobë” në vlerën 100,000 (njëqind mijë) lekë.