Deputeti sulmon me tone të ashpra Bashkinë e kryeqytetit

Deputeti i Partisë Socialiste, Erion Braçe, ka reaguar me tone të forta lidhur me situatën e mbetjeve në disa zona të Tiranës, duke shprehur pakënaqësi të thellë për gjendjen e krijuar në rrugët e kryeqytetit.

Në një reagim publik, Braçe ka akuzuar drejtpërdrejt Bashkinë e Tiranës dhe punonjësit e saj për neglizhencë dhe mungesë përgjegjshmërie, duke theksuar se problemi ka javë që vazhdon pa u zgjidhur.

Sipas tij, qytetarët prej rreth tre javësh po kontaktojnë institucionet për të kërkuar largimin e mbetjeve që janë krijuar nga vetë ndërhyrjet e bashkisë, ndërsa prej dy javësh edhe ai vetë, në cilësinë e deputetit, ka kërkuar ndërhyrje për pastrimin e zonës.

Braçe e cilësoi të papranueshme këtë situatë, duke ngritur pyetjen nëse ekziston ndonjë ndjenjë përgjegjësie apo turpi institucional. Ai kritikoi ashpër mesazhin që, sipas tij, po përcillet ndaj qytetarëve, duke lënë të kuptohet se autoritetet lokale nuk reagojnë ndaj askujt.

Reagimi i deputetit u shoqërua me tone të ashpra dhe thirrje për reflektim, duke kërkuar që Bashkia e Tiranës të marrë masa të menjëhershme për zgjidhjen e problemit dhe pastrimin e zonave të prekura.