Braho kërkon sekuestrimin e të gjitha pasurive të Ermal Beqirit

Kreu i Strukturës së Posaçme Kundër Korrupsionit dhe Krimit të Organizuar, Klodian Braho, ka bërë të ditur se procedurat për sekuestrimin e pasurive të Ermal Beqirit në Francë janë në proces aktiv.

Gjatë një deklarate për mediat, ai sqaroi se kërkesa e autoriteteve shqiptare nuk kufizohet vetëm te një pasuri e vetme, por përfshin të gjithë asetet që i përkasin personit nën hetim në territorin francez. Sipas tij, bëhet fjalë për një proces të gjerë verifikimi dhe ndërhyrjeje ligjore, i cili pritet të konkretizohet me njoftime zyrtare në vijim.

Braho theksoi se hetimet janë duke u thelluar dhe se në fokus nuk është vetëm avioni për të cilin është raportuar publikisht, por edhe pasuri të tjera të mundshme që lidhen me Beqirajn.

Ermal Beqiri u vu në pranga në Francë pas një kërkese ndërkombëtare të autoriteteve shqiptare, në kuadër të hetimeve për dosjen e njohur si “AKSHI”. Ai përballet me disa akuza penale, ndërsa ndërkohë kanë nisur edhe procedurat për ekstradimin e tij drejt Shqipërisë.

Rasti konsiderohet një nga zhvillimet më të rëndësishme të fundit në luftën kundër korrupsionit dhe krimit të organizuar, me fokus ndjekjen e pasurive jashtë vendit.