Çfarë erdhi nga SHBA-ja? Basha në ‘rrjetën’ e SPAK për 21-janarin

Zbardhen detaje të reja mbi paraqitjen e ish-kryetarit të Partisë Demokratike, Lulzim Basha, në Prokurorinë e Posaçme (SPAK). Basha është thirrur si person që ka dijeni për hetimet në kuadër të dosjes së “21 Janarit”.

Burime bëjnë me dije se fletëthirrja për Bashën mban firmën e prokurorit Alfred Shehu, i cili po drejton hetimet për ngjarjet e dhunshme të 21 janarit 2011. Aso kohe, opozita e drejtuar nga Edi Rama organizoi një protestë përpara Kryeministrisë, ku mbetën të vrarë katër qytetarë: Aleks Nika, Hekuran Deda, Ziver Veizi dhe Faik Myrtaj.

Në momentin e ngjarjes, Lulzim Basha mbante detyrën e ministrit të Brendshëm dhe ndodhej në ambientet e Kryeministrisë, ku Garda e Republikës hapi zjarr ndaj protestuesve.

Rihapja e hetimeve është bërë mbi bazën e të dhënave të reja të ardhura nga Shtetet e Bashkuara të Amerikës, të cilat lidhen me materiale audio të depozituara më pas nga gazetari Artan Hoxha dhe xhaxhai i viktimës Aleks Nika. Këto të dhëna kanë bërë që SPAK të regjistrojë një procedim të ri penal për të zbardhur përgjegjësitë e zyrtarëve të lartë të kohës.

Lulzim Basha është pyetur edhe më herët në lidhje me këtë ngjarje, ndërsa në vitin 2020 Prokuroria e Tiranës kishte kërkuar aktekspertizë për predhën e nxjerrë në Turqi nga trupi i Aleks Nikës. Kjo ekspertizë u bë një nga bazat e rihapjes së çështjes nga SPAK.

Aktualisht, për ngjarjet e 21 janarit janë dënuar vetëm dy persona, Ndrea Prendi dhe Agim Llupo, ish-efektivë të Gardës së Republikës, të cilët e kanë përfunduar dënimin e tyre, ndërsa hetimet për rolin e ish-zyrtarëve të tjerë vijojnë.