Demo dhe Hita zbarkojnë në Rinas: 9.2 milionë turistë në 8 muaj!

Ministri i Brendshëm, Ervin Demo, dhe Drejtori i Përgjithshëm i Policisë së Shtetit, Skënder Hita, inspektuan punën e Policisë Kufitare në Rinas, teksa në fokus ishin flukset e larta të udhëtarëve, përdorimi i teknologjisë dhe lufta kundër kriminalitetit ndërkufitar.

Ministri i Brendshëm, Ervin Demo, dhe Drejtori i Përgjithshëm i Policisë së Shtetit, Skënder Hita, zhvilluan një vizitë në Aeroportin Ndërkombëtar të Tiranës, ku inspektuan nga afër punën e strukturave të Policisë Kufitare dhe mënyrën e menaxhimit të fluksit të udhëtarëve.

Gjatë takimit me efektivët, Demo dhe Hita u njohën me angazhimin e strukturave kufitare për përballimin e numrit të lartë të hyrjeve dhe daljeve në Rinas, ndërsa vëmendje e veçantë iu kushtua edhe përdorimit të teknologjisë për përshpejtimin e procedurave të kontrollit.

Sipas të dhënave të bëra publike gjatë vizitës, 9.2 milionë turistë kanë hyrë në Shqipëri gjatë tetë muajve të parë të vitit, ndërsa vetëm gjatë muajit gusht janë regjistruar rreth 1.7 milionë hyrje turistike.

Përballimi i këtij fluksi kërkon angazhim të shtuar të strukturave kufitare, si për garantimin e sigurisë, ashtu edhe për shmangien e vonesave në përpunimin e udhëtarëve.

Në këtë drejtim, një rol gjithnjë e më të rëndësishëm po luan teknologjia. Gjatë takimit u bë e ditur se mbi 3 milionë pasagjerë janë përpunuar përmes sistemit e-Gate, ndërsa përdorimi i sistemeve të automatizuara pritet të zgjerohet edhe më tej në pikat kufitare.

Duke iu drejtuar punonjësve të Policisë Kufitare, ministri Ervin Demo vuri theksin te rëndësia e kontaktit të parë që vizitorët kanë me institucionet shqiptare.

“Ju jeni fytyra e parë që ata shohin për vendin tonë dhe marrëdhënia që ne krijojmë me këdo që futet në kufi është ajo që duam të tregojmë për vendin tonë. Ne presim rritje të numrit të turistëve, që do të thotë më shumë fluks dhe punë për forcat e policisë. Muaji gusht ka qenë i jashtëzakonshëm, 1.7 milionë turistë. 9.2 milionë për këtë 3-mujor. Mbi 3 milionë pasagjerë të përpunuar përmes sistemit e-Gate”, deklaroi Demo.

Ndërkohë, Drejtori i Përgjithshëm i Policisë së Shtetit, Skënder Hita, e vuri theksin te një tjetër dimension i punës së strukturave kufitare: parandalimi dhe goditja e kriminalitetit ndërkufitar.

Hita tha se krahas menaxhimit të flukseve të udhëtarëve, shërbimet kufitare vijojnë të monitorojnë rastet e kriminalitetit dhe të bashkëpunojnë me autoritetet për identifikimin e personave të përfshirë në veprimtari të paligjshme.

“Shërbimet kufitare nuk kanë lënë jashtë vëmendjes edhe goditjen e kriminalitetit dhe krimeve ndërkufitare. Të gjithë autoritetet kanë bërë një punë shumë të mirë në identifikimin e këtyre rasteve dhe vënien para përgjegjësisë të autorëve”, u shpreh Hita.

Vizita e Demon dhe Hitës në Rinas u zhvillua në një periudhë me flukse të larta hyrjesh në vend, ndërsa përballimi i numrit në rritje të udhëtarëve po shoqërohet me përdorimin më të gjerë të teknologjisë dhe me forcimin e kapaciteteve të strukturave kufitare.

Në fokus mbetet ruajtja e sigurisë në pikat e kalimit kufitar, përpunimi sa më i shpejtë i udhëtarëve dhe evidentimi i rasteve të kriminalitetit ndërkufitar.