“Prestigjatorët Rama-Balluku ‘zhdukën’ miliona euro”

Deputeti i Partisë Demokratike, Belind Këlliçi, ka denoncuar një tjetër shkelje lidhur me Tunelin e Llogarasë, duke akuzuar kryeministrin Edi Rama dhe ministresën Belinda Balluku për zhdukjen e miliona eurove të taksapaguesve.

“Sot ndërtuesi më i madh serial pa leje është vetë shteti dhe Rama. Rama dhe Balluku janë jo vetëm hajdutë serialë të parave, por edhe prestigjatorë. 190 milionë euro janë shpenzuar për ndërtimin e tunelit, projekti i të cilit parashikonte gjithashtu dy ura panoramike në hyrje dhe dalje, të cilat në realitet nuk u ndërtuan. 25 milionë euro për ndërtimin e dy urave që në fakt nuk ekzistojnë. Prestigjatori zhduku miliona euro dhe dy ura. Kjo është një aferë thellësisht korruptive, jo thjesht një shkelje e barazisë në tendera”, tha Këlliçi.

Ai shtoi se çdo përpjekje për të justifikuar ose fshehur këtë situatë nuk mund të ndryshojë faktin që projekti ka dështuar dhe paratë e shqiptarëve janë shfrytëzuar në mënyrë të paligjshme.