Denoncimi: UKT lë në mëshirë të fatit qytetarin e sëmurë

Një rast që ngre pikëpyetje serioze mbi funksionimin e institucioneve publike është denoncuar nga Partia Demokratike, e cila akuzon për neglizhencë dhe mungesë ndjeshmërie sociale në trajtimin e një qytetari në gjendje të rënduar shëndetësore dhe ekonomike.

Zëdhënësja për Antikorrupsionin në PD, Genta Vangjeli, ka bërë publik rastin e Arben Kalemajt, një qytetar që vuan nga sëmundje të rënda kardiake dhe mbijeton me rreth 50 euro asistencë ekonomike në muaj. Sipas saj, ai vijon të jetë pa furnizim me ujë në banesë, edhe pse ka shlyer detyrimet financiare ndaj ndërmarrjes së ujësjellësit.

Sipas denoncimit, ndërprerja e ujit ka ardhur si pasojë e vonesës në pagesën e faturave për dy muaj, ndërsa pas shlyerjes së tyre, qytetari ka kërkuar zyrtarisht rilidhjen e shërbimit. Megjithatë, pavarësisht premtimeve se furnizimi do të rikthehej brenda pak ditësh, situata mbetet e pandryshuar.

Vangjeli e cilëson këtë rast si një shembull të papranueshëm të neglizhencës institucionale, duke theksuar se një qytetar në kushte të tilla nuk mund të lihet pa një shërbim jetik si uji.

Në reagimin e saj, ajo kërkon rikthimin e menjëhershëm të furnizimit me ujë për Arben Kalemajn, duke theksuar se uji është një e drejtë themelore dhe nuk duhet të përdoret si mjet ndëshkimi ndaj qytetarëve në vështirësi.

Partia Demokratike i bën thirrje institucioneve përgjegjëse të ndërhyjnë pa vonesë për zgjidhjen e situatës, duke nënvizuar se mënyra se si trajtohen shtresat më vulnerabël është tregues i drejtpërdrejtë i përgjegjshmërisë së një shteti ndaj qytetarëve të tij.