Der Spiegel: Lëvizje masive në Shqipëri kundër korrupsionit dhe Ramës

Revista prestigjioze gjermane “Der Spiegel” i ka kushtuar një analizë të zgjeruar valës së protestave që prej më shumë se një muaji po zhvillohen në Shqipëri, ku një nga kërkesat kryesore mbetet dorëheqja e kryeministrit Edi Rama.

Në artikull theksohet se protestat kanë evoluar përtej një reagimi të momentit, duke u shndërruar në një lëvizje më të gjerë qytetare kundër korrupsionit, ndikimit të oligarkëve dhe qeverisjes aktuale. Sipas medias gjermane, mijëra qytetarë kanë dalë vazhdimisht në rrugët e Tiranës, duke marshuar dhe duke shprehur pakënaqësinë e tyre përmes thirrjeve dhe pankartave drejtuar kreut të qeverisë.

Protestat janë kthyer në një aktivitet të përjavshëm në kryeqytet, ku simbolika e përdorur nga demonstruesit ka marrë vëmendje të veçantë. Flamingoja është shndërruar në një ikonë të kësaj lëvizjeje, si shenjë e mbrojtjes së lagunës së Nartës dhe zonës së Zvërnecit, ku parashikohet një investim i madh me vlerë rreth 4 miliardë dollarë.

Artikulli nënvizon se pakënaqësia e qytetarëve nuk lidhet drejtpërdrejt me figura ndërkombëtare si Jared Kushner apo Donald Trump, por me vetë klasën politike shqiptare. Në protestë dëgjohen thirrje jo vetëm kundër kryeministrit aktual Edi Rama, por edhe ndaj ish-kryeministrit Sali Berisha, çka sipas analizës tregon një lodhje të përgjithshme të shoqërisë ndaj elitave të njëjta politike.

Sipas “Der Spiegel”, kjo lëvizje ka arritur të bashkojë një gamë të gjerë grupesh shoqërore, duke përfshirë aktivistë të mjedisit, të rinj, pensionistë, pjesëtarë të diasporës dhe qytetarë pa angazhim politik, duke e kthyer në një mobilizim gjithëpërfshirës.

Revista gjermane e cilëson këtë si një nga mobilizimet më të mëdha qytetare në Shqipëri që nga fillimi i viteve ’90. Ndërkohë, kryeministri Edi Rama ka mbajtur një qëndrim mohues ndaj akuzave, duke i hedhur poshtë pretendimet për korrupsion dhe duke sugjeruar se protestat mund të jenë të ndikuara nga faktorë të jashtëm.