Dëshmia e njërit prej autorëve të sulmit ndaj Sokol Mëngjesit: Shkuam për t’i dhënë një mesazh

Zbardhet dëshmia e njërit prej të arrestuarve për sulmin e djeshëm ndaj avokatit Sokol Mëngjesi, ngjarje që ndodhi në zonën e ish-Bllokut.

“Shkuam për t’i dhënë një mesazh. Nuk e menduam që situata do të rëndohej kaq dhe avokati do të merrte kaq dëme të rënda”, tha Dorian Alia. 

Ndërkohë Dritan Jani Nano, 58 vjeç, i cili u shoqërua nga policia, nuk ka pranuar që të jetë organizatori i ngjarjes.

“Nuk e organizova unë sulmin ndaj avokatit. Nuk kam lidhje me ngjarjen”, mësohet të ketë thënë Nano. 

Policia ka mundur të zbardhë ngjarjen. 4 autorët janë Dorian Alia, 32 vjeç, Drivald Alia, 21 vjeç, Elton Ndue Kasaj, 33 vjeç, dhe Romario Roberto Tabaku, 26 vjeç, të cilët goditën mëngjesin e së mërkurës me leva avokatin.

Sipas uniformave blu avokati u godit për shkak të detyrës.

Po nga veprimet hetimore rezulton se avokati ka përfaqësuar ligjërisht në një proces civil në Shkallë të Parë dhe në Apel një familje, e cila kishte të trashëguar një pronë në qytetin e Tiranës, proces i cili është fituar nga pala e përfaqësuar prej tij.

Disa nga trashëgimtarët nuk kanë pranuar të plotësojnë kushtet ligjore të kontratës së nënshkruar me studion Lligjore “ALTERUM SHPK”.