Dezinformim në masë/ Çfarë po ndodh me ndërkombetarët, për “luftën” Kosovë Serbi

Portali në gjuhën shqipe “promakale.com”, i cili është përfshirë në të kaluarën në shpërndarjen e lajmeve të dyshimta, ka publikuar një lajm të datës 26 qershor që në fakt është i vitit 2022. Ky lajm, i titulluar “ISH-USHTARAKU ITALIAN: VUÇIQ U PARALAJMËRUA MBRËMË, NËSE SULMON KOSOVËN, AEROPLANËT LUFTARAKË TË NATO-S DO TË REAGOJNË BRENDA PAK ORËSH”, u publikua si i aktual, duke lënë përshtypjen se ishte një zhvillim i ri.

Verifikimi i lajmit nga publiktv.live zbuloi se ky lajm kishte të bënte me një ngjarje të ndodhur më 1 gusht 2022, kur Thomas Theiner, ish-anëtar i ushtrisë italiane, kishte paralajmëruar përmes Twitterit reagimin e NATO-s nëse Serbia do të sulmonte Kosovën. Lajmi origjinal lidhej me një vendim të Qeverisë së Kosovës për të zbatuar reciprocitetin me Serbinë për targat dhe letërnjoftimet.

Një faqe e Facebookut me emrin “Post Lajme”, e cila ka mbi 16 mijë ndjekës, gjithashtu e publikoi lajmin e njëjtë më 26 qershor, duke e paraqitur si aktual. Praktika e rishikimit të lajmeve të vjetra si të reja është një formë e dezinformacionit, e cila mund të çojë në keqkuptim dhe konfuzion te lexuesit.