Digjet nga flakët bujtina turistike në Librazhd

Një incident i rëndë është regjistruar gjatë natës në fshatin Dorëz, pjesë e Njësisë Administrative Qendër në Librazhd, ku një bujtinë është përfshirë nga flakët, duke pësuar dëme të konsiderueshme materiale.

Sipas të dhënave zyrtare, policia është njoftuar për zjarrin rreth orës 22:46. Menjëherë pas sinjalizimit, në vendngjarje kanë mbërritur forcat zjarrfikëse, policia dhe banorë të zonës, të cilët u angazhuan për neutralizimin e flakëve.

Në operacion morën pjesë 12 efektivë zjarrfikës me dy mjete, të cilët punuan për disa orë në kushte të vështira, deri në shuarjen e plotë të zjarrit rreth orës 03:00 të mëngjesit të 10 prillit.

Hetimet paraprake tregojnë se shkaku i mundshëm i zjarrit lidhet me një defekt në rrjetin elektrik të amortizuar, ndërsa përhapja e shpejtë e flakëve është favorizuar nga struktura prej druri e objektit.

Si pasojë e zjarrit janë djegur rreth 80 metra katrorë të bujtinës, përfshirë ambientet e kuzhinës, dhomës së gjumit dhe tualetit. Objekti përdorej për aktivitet turistik.

Fatmirësisht, nga kjo ngjarje nuk raportohet për persona të lënduar, ndërsa autoritetet vijojnë hetimet për të sqaruar plotësisht rrethanat.