Drama tek Apeli, çfarë bëri Elvis Shkambi pasi vrau gjyqtarin Kalaja

Hetimet për ngjarjen e rëndë të ndodhur më 6 tetor në ambientet e Gjykatës së Apelit Tiranë kanë zbuluar detaje të reja për veprimet dhe motivet e Elvis Shkambit, 30-vjeçarit të akuzuar për vrasjen e gjyqtarit Astrit Kalaja.

Nga dosja hetimore rezulton se i riu e ka kryer aktin menjëherë pas shpalljes së një vendimi gjyqësor për një çështje pronësie, që sipas tij kishte qenë i padrejtë. Pasi qëlloi me armë ndaj gjyqtarit, ai është larguar nga salla dhe ka dorëzuar armën e zjarrit tek një punonjës sigurie, pa treguar se çfarë kishte ndodhur.

Më pas, Shkambi i ka dhënë çelësat e makinës xhaxhait, duke i kërkuar të largohej, ndërsa vetë ka qëndruar pranë gjykatës deri në momentin që është arrestuar nga policia. Ai ka pohuar se arma, e mbajtur pa leje prej rreth dhjetë vitesh, përdorej vetëm për vetëmbrojtje dhe nuk ishte nxjerrë asnjëherë më parë.

Sipas të dhënave të hetimit, në momentin e krimit autori i dyshuar ka qenë në gjendje të rënduar emocionale dhe ka vepruar në impuls, pas ndjenjës së padrejtësisë që pretendonte se i ishte bërë. Në vijim të veprimeve procedurale, ai ka shprehur pendesë për ngjarjen, duke pranuar se nuk kishte dashur që situata të përfundonte në tragjedi.