Dronët serbë shfaqen mbi Kosovë, njoftohet menjëherë KFOR-i

Drejtori i Përgjithshëm i Policisë së Kosovës, Gazmend Hoxha, ka deklaruar se kohët e fundit janë regjistruar fluturime të dronëve mbi hapësirën ajrore të Kosovës, për të cilat dyshohet se vijnë nga territori i Serbisë. Sipas tij, incidentet janë shënuar kryesisht në pjesën veriore të vendit dhe përbëjnë shqetësim serioz për sigurinë kufitare.

Në një deklaratë publike të dhënë të premten, Hoxha theksoi se institucionet e sigurisë janë në bashkëpunim të ngushtë me KFOR-in, i cili ka kompetencën mbi hapësirën ajrore të Kosovës.

“Gjatë ditëve të fundit kemi pasur fluturime të dronëve që ne po dyshojmë që vijnë nga territori i Serbisë, në pjesën veriore të Kosovës. Policia është në kontakt me KFOR-in dhe jemi duke e bërë monitorimin se çfarë mund të bëhet. Është e rrezikshme për pjesën e kufirit por për qytetarët tanë jo. Ne jemi duke i mbrojtur,” tha ai.

Drejtori shtoi se për çdo incident janë njoftuar partnerët ndërkombëtarë dhe se “hapësira ajrore është përgjegjësi e KFOR-it, ne e kemi njoftuar KFOR-in dhe partnerët tanë. KFOR-i, është përgjegjësi e tyre dhe janë duke punuar në këtë drejtim.”

Pavarësisht kësaj, misioni i KFOR-it nuk ka dhënë ende një përgjigje zyrtare lidhur me këto raportime dhe nuk është prononcuar mbi çështjen.

Edhe Ministri në detyrë i Punëve të Brendshme, Xhelal Sveçla, konfirmoi të mërkurën se është regjistruar “cënim i hapësirës ajrore nga dronë që dyshohet se vijnë nga Serbia”, duke shtuar se autoritetet po e trajtojnë këtë situatë me seriozitet dhe bashkëpunim të ngushtë me partnerët ndërkombëtarë.