Dyshime për falsifikim dokumentesh, Prokuroria çon në gjyq noteren Anila Haxhiu

Prokuroria e Fierit ka përfunduar hetimet dhe ka dërguar për gjykim noteren Anila Haxhiu, e dyshuar për falsifikim të përsëritur të dokumenteve noteriale gjatë periudhës 2011–2020. Sipas organit të akuzës, ajo dyshohet se ka hartuar akte duke përdorur emrat e noterëve të tjerë, si dhe ka përpiluar dokumente pa praninë e palëve, në rastet kur kjo kërkohej nga ligji.

Çështja lidhet me procedimin penal nr. 1050, të regjistruar në vitin 2019. Në përfundim të hetimeve, Prokuroria e Fierit ka ngritur ndaj noteres akuzën e falsifikimit të dokumenteve nga personi që ka për detyrë t’i lëshojë ato, të kryer më shumë se një herë. Vepra penale parashikohet nga neni 186, paragrafi i tretë, i Kodit Penal.

Sipas hetuesve, gjatë ushtrimit të aktivitetit të saj profesional, Haxhiu dyshohet se ka hartuar dhe lëshuar akte noteriale duke vendosur emrat e noterëve të tjerë, të cilët nuk rezultonin autorë të dokumenteve përkatëse.

Një tjetër element i evidentuar nga hetimi lidhet me përpilimin e akteve pa praninë e palëve, pavarësisht se pjesëmarrja e tyre ishte e nevojshme për kryerjen e veprimeve noteriale.

Dyshime edhe për kontratat e shitjes së automjeteve

Hetimet kanë evidentuar gjithashtu kontrata për shitjen e automjeteve, të hartuara gjatë viteve 2011–2018, të cilat, sipas Prokurorisë, nuk rezultonin të regjistruara në regjistrat përkatës noterialë të personave në emër të të cilëve ishin lëshuar.

Në një numër të konsiderueshëm rastesh, dyshohet se është përdorur emri i një notereje me zyrë në Tiranë, ndërsa dokumentet përkatëse pretendohet se janë hartuar në Fier nga e pandehura.

Përveç procedimit të regjistruar në vitin 2019, ndaj së njëjtës notere janë përfunduar hetimet edhe në kuadër të procedimit penal nr. 390/2023. Edhe në këtë çështje, ajo është marrë e pandehur për të njëjtën vepër penale, atë të falsifikimit të dokumenteve nga personi që ka për detyrë t’i lëshojë ato.

Dërgimi i çështjes për gjykim shënon përfundimin e fazës së hetimeve nga Prokuroria e Fierit, ndërsa përgjegjësia penale e të pandehurës do të vlerësohet nga gjykata. Deri në një vendim të formës së prerë, ajo prezumohet e pafajshme.