E akuzuar për mashtrim dhe korrupsion, lirohet Federica Mogherini

Federica Mogherini, e ndaluar të martën pasdite në Belgjikë si pjesë e një hetimi lidhur me tenderin për krijimin e një kursi pasuniversitar të financuar nga BE-ja për diplomatë të rinj në Kolegjin Evropian në Bruges, institucion ku ish-Përfaqësuesja e Lartë e BE-së për Politikën e Jashtme shërbente si rektore, është liruar.

Sipas agjencisë së lajmeve Agi, Mogherini u ndalua së bashku me dy shtetas italianë: ambasadorin Stefano Sannino, ish-sekretar i përgjithshëm i EEAS, struktura evropiane që kishte iniciuar tenderin prej 990 mijë eurosh për kursin gjatë viteve 2021–2022, si dhe Cesare Zegrettin, menaxher i po këtij kolegji prestigjioz në Bruges.

Akuzat e ngritura nga Zyra e Prokurorit Federal në Bruges dhe Zyra e Prokurorit Publik Evropian (EPPO) përfshijnë mashtrim në prokurimet publike, korrupsion, konflikt interesi, shkelje të sekretit profesional dhe konkurrencë të padrejtë.