Zbardhet skema e pastrimit të parave nga Veliaj dhe Ajola Xoxa

Një zhvillim i paprecedentë ka tronditur hetimet mbi aferat korruptive të kryetarit të Bashkisë Tiranë, Erion Veliaj. Një prej 30 personave të marrë zyrtarisht të pandehur në këtë dosje voluminoze ka vendosur të bashkëpunojë me drejtësinë, duke u bërë dëshmitare e mbrojtur e Prokurorisë së Posaçme.

Burime të sigurta për Publik.al konfirmojnë se e penduara është një nga personat më të afërt me Ajola Xoxën, bashkëshorten e kryebashkiakut, dhe konsiderohet si “truri financiar” i saj. Ajo ka dorëzuar pranë SPAK dokumente, skema dhe dëshmi të hollësishme që zbulojnë rrjetin e korrupsionit dhe pastrimit të parave, ku sipas saj janë të përfshirë Veliaj dhe Xoxa në bashkëpunim të ngushtë.

Kjo është hera e parë që SPAK arrin të ketë një “të penduar” nga rrethet më të afërta të një zyrtari të lartë të pushtetit vendor dhe të ekzekutivit politik. Dëshmitë e saj janë konsideruar kyçe për zbardhjen e mekanizmave që, sipas Prokurorisë, janë përdorur për të devijuar dhe përvetësuar fondet publike përmes kontratave klienteliste, transaksioneve fiktive dhe përdorimit të kompanive offshore.