Ndryshim i heshtur te kompania që menaxhon mbetjet në Tiranë

Kompania Eco Tirana, që menaxhon mbetjet në kryeqytet, ka pësuar një tjetër ndryshim te partneri privat. Kompania italiane që zotëron 49% të aksioneve, e njohur deri tani si AGSM AIM, ka ndryshuar emrin në Magis në fund të vitit 2025.

Eco Tirana është krijuar në vitin 2016 si partneritet publik-privat mes Bashkisë së Tiranës, që mban 51% të aksioneve, dhe partnerit italian që zotëron 49%.

Ndërsa në Itali ky ndryshim ka hapur debat politik dhe media kanë ngritur pyetje për transparencën dhe kostot e rebranding-ut, në Shqipëri ndryshimi i emrit të ortakut kryesor ka kaluar pothuajse pa asnjë informacion publik.

Ndërsa në Itali kërkohen sqarime politike dhe financiare, në Shqipëri ndryshimi i emrit të partnerit që zotëron 49% të Eco Tirana nuk është shoqëruar me debat publik apo raportim institucional. Mbeten të paqarta marrëveshjet financiare, roli i partnerit privat dhe ndikimi i tij në menaxhimin e shërbimit të mbetjeve në kryeqytet.

Emri mund të ketë ndryshuar nga AGSM AIM në Magis, por për qytetarët e Tiranës një gjë mbetet e njëjtë: mungesa e transparencës mbi mënyrën se si funksionon një nga partneritetet publike-private më të rëndësishme të Bashkisë së Tiranës.