Ekzekutimi i biznesmenit Edmond Mëhalla, identifikohen autorët

Policia ka bërë të ditur se janë identifikuar dy persona të dyshuar si autorë të vrasjes së biznesmenit Edmond Mëhalla dhe janë shpallur në kërkim. Një tjetër person është arrestuar si bashkëpunëtor i ngjarjes.

Në pranga është vënë 32-vjeçari Xhino Ago, i dyshuar si bashkëpuëntor, pasi i ka dhënë automjetin njërit prej autorëve. U arrestua edhe roja i arburantit Kujtim Pisha për moskallëzim krimi. Identifikohen dy autorët dhe shpallen në kërkim.

Dy autorët janë identifikuar si Marselo Arani dhe Armando Kola.

Gjatë veprimeve hetimore, policia gjeti të djegur automjetin që përdorën autorët për të kryer krimin, si dhe armën e zjarrit të përdorur në ngjarje.

Përveç këtyre, u sekuestruan dokumente të lidhura me shitblerjen e automjetit, tre telefona celularë dhe dy pajisje DVR, që do të ndihmojnë në zbardhjen e plotë të dinamikës së vrasjes.

Njoftimi i Policisë

Si rezultat i një pune intensive hetimore të kryer në kuadër të operacionit policor të koduar “Strike”, për zbardhjen e autorësisë së ngjarjes së ndodhur më datë 30.11.2025, në lagjen “Emin Matraxhiu”, ku mbeti i vrarë me armë zjarri shtetasi M. M., alias E. H., strukturat për Hetimin e Krimeve të Rënda të DVP Elbasan, në drejtimin e Prokurorisë dhe me mbështetjen e Drejtorisë së Përgjithshme të Policisë së Shtetit, gjetën prova të rëndësishme që çuan në zbardhjen e ngjarjes.

Gjithashtu, gjatë operacionit u zbardh mekanizmi i ngjarjes, i dokumentuar edhe me disa pamje filmike.

Në përfundim të hetimeve u bë arrestimi i shtetasve:

Xh. A., 32 vjeç, banues në Elbasan, (i dyshuar si bashkëpunëtor), për veprat penale “Vrasje me paramendim”, kryer në bashkëpunim, dhe “Prodhimi dhe mbajtja pa leje e armëve, armëve shpërthyese dhe municionit”;

K. P., 52 vjeç, për veprën penale “Moskallëzim i krimit”.

Dhe u shpallën në kërkim shtetasit M. A., 32 vjeç, banues në Elbasan, ndërkohë që ishte në masën e sigurisë “Arrest në shtëpi” për një tjetër vepër penale, si dhe A. K., 35 vjeç, banues në Laç, (të dyshuar si autorë të vrasjes), për veprat penale “Vrasje me paramendim”, kryer në bashkëpunim, “Prodhimi dhe mbajtja pa leje e armëve, armëve shpërthyese dhe municionit” dhe “Largimi i të burgosurit nga vendi i qëndrimit”.

Nga veprimet hetimore rezultoi se automjeti i përdorur nga autorët është në pronësi të shtetasit Xh. A., i cili ia ka dhënë me hua për përdorje shtetasit M. A.

Grupi i posaçëm hetimor, nën drejtimin e Prokurorisë, vijon veprimet intensive hetimore për identifikimin dhe kapjen e personave të tjerë të përfshirë në këtë ngjarje.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.