EMRI/ Tragjike, rrjedha e përroit i merr jetën 40-vjeçarit në Elbasan

Një ngjarje tragjike ka ndodhur në fshatin Mlizë të Elbasanit, ku 40-vjeçari Florian Tahiri humbi jetën pasi u rrëmbye nga rrjedha e fuqishme e përroit të zonës.

Ngjarja ka ndodhur ditën e djeshme, teksa dyshohet se Tahiri po kalonte urën në momentin kur prurjet e shtuar të ujit e morën përpara. Rrjedha e përroit ishte shumë më e fortë se zakonisht për shkak të reshjeve intensive.

Kur ai nuk u kthye në shtëpi në drekë, familjarët alarmuan autoritetet dhe nisën kërkimet përgjatë shtratit të përroit. Pamjet e kamerave të bizneseve pranë zonës kanë qenë vendimtare, pasi kanë fiksuar momentin kur 40-vjeçari tërhiqet me forcë nga rrjedha, duke ndihmuar ekipet e kërkimit të përcaktojnë drejtimin e lëvizjes së trupit.

Kërkimet kanë vijuar pa ndërprerje gjatë gjithë natës nga zjarrfikësit dhe emergjencat civile të Elbasanit. Mëngjesin e sotëm, trupi i pajetë i viktimës është gjetur rreth 1 kilometër larg urës ku dyshohet se ka ndodhur ngjarja.