Erdogan i dërgoi letër, Kurti i përcjell mesazhin përmes ambasadorit: Do të marrim në shqyrtim vendodhjen e ambasadës sonë në Jeruzalem

Këtë deklaratë Kurti e bëri ditën e sotme gjatë takimit me ambasadorin turk Çağri Sakar. Në postimin e faqes së LVV-së, bëhet me dije se ambasadori turk ka uruar Albinin për rezultatin e zgjedhjeve, teksa ka shtuar se Turqia do të vazhdojë të mbështesë qeverinë e re, e cila pritet të formohet së shpejti.

Në fund Kurti falenderoi ambasadorin turk për vizitën, si dhe letrën e urimit nga presidenti i Turqisë, Recep Tayyip Erdoğan.

Postimi i plotë i LVV-së:

Sot, Kryeministri në ardhje, Albin Kurti, bashkë me kandidaten për deputete, Fitore Pacolli dhe asistenten ekzekutive, Valë Gjonbalaj, në zyret e Lëvizjes priti Ambasadorin e Turqisë, z. Çağri Sakar, dhe sekretaren e dytë të ambasadës, znj. Dilara Köseoğlu.

Ambasadori uroi Kryetarin Kurti për rezultatin e zgjedhjeve duke theksuar se ai dhe Turqia janë të interesuar të thellojnë bashkëpunimin me qeverinë në ardhje. Kryetari Kurti e falendëroi Ambasadorin për vizitën, si dhe për letrën e urimit nga Presidenti i Turqisë, Recep Tayyip Erdoğan.

Kryeministri në ardhje, Kurti e informoi Ambasadorin për prioritetet e qeverisë së tij dhe potencoi se në raport me Turqinë do të fokusohemi në shtimin e marrëdhënieve tona bilaterale, posaçërisht në fushën e zhvillimit ekonomik.

Sa i përket çështjes rreth vendosjes së Ambasadës së Republikës së Kosovës në Jerusalem, Kurti tha se njohja dhe vendosja e marrëdhënieve diplomatike me shtetin e Izraelit është shumë e rëndësishme për Kosovën, dhe mundësi e mirë për zhvillim, ndërsa rreth vendit se ku do të vendoset ambasada është një çështje që do të shqyrtohet duke parë edhe dokumentacionin e qeverisë në ikje.

Në fund, të dy u dakorduan që porsa të formohen institucionet e reja të legjislaturës së tetë do të vazhdojmë bashkëpunimin në mes të dy vendeve tona mike.