Eurodeputetja italiane: Ja kush është pas projektit të Sazanit dhe Nartës

Eurodeputetja italiane Ilaria Salis ka reaguar lidhur me pjesëmarrjen e saj në protestën e zhvilluar në Tiranë kundër projektit të propozuar për zonën e Sazanit dhe Nartës, duke theksuar se prania e saj kishte si synim mbështetjen e kauzës për mbrojtjen e mjedisit dhe të vlerave demokratike.

Në një prononcim për A2, Salis u shpreh se kjo protestë nuk duhet parë vetëm si një lëvizje ambientaliste, por si një mobilizim i gjerë qytetar që lidhet drejtpërdrejt me demokracinë dhe sovranitetin e vendit.

“Erdha në Tiranë për të mbështetur popullin shqiptar, sepse kjo është një protestë për mjedisin, por edhe për demokracinë dhe sovranitetin e popullit.

Mesazhi i protestuesve është se Shqipëria nuk është në shitje dhe askush nuk mund të vijë nga jashtë për të blerë territor të Republikës së Shqipërisë”, u shpreh Salis.

Më tej, ajo ngriti shqetësime lidhur me aktorët që, sipas saj, qëndrojnë pas projektit në zonën e Lagunës së Nartës dhe Zvërnecit.

“Mendojmë se ata që qëndrojnë pas këtij projekti në Lagunën e Nartës, në Zvërnec, janë të njëjtët që në të kaluarën kanë bërë invazione në shtete të ndryshme.

Ne e kundërshtojmë këtë logjikë imperialiste. Jemi kundër këtyre metodave të zhvillimit”, deklaroi Salis.