61 ditë revoltë, qytetarët mblidhen sot sërish në protestë

Protesta kundër qeverisë hyn sot në ditën e saj të 61-të, duke konfirmuar vazhdimësinë e një prej lëvizjeve më të gjata qytetare të muajve të fundit në vend. Edhe këtë pasdite, qytetarë dhe aktivistë pritet të mblidhen sërish përpara godinës së Kryeministrisë në Tiranë, në një tjetër tubim që synon të mbajë gjallë presionin ndaj ekzekutivit.

Ajo që fillimisht u nxit nga zhvillimet dhe debatet rreth projektit në Zvërnec, tashmë është shndërruar në një reagim të përditshëm qytetar, i cili ka marrë përmasa të gjera dhe ka krijuar një ritëm të qëndrueshëm protestash në kryeqytet. Për më shumë se dy muaj, rrugët e Tiranës janë kthyer në pikë takimi për qytetarë që kundërshtojnë qeverinë dhe kërkojnë ndryshim të thellë politik.

Gjatë 60 ditëve të kaluara, protestuesit kanë organizuar tubime të vazhdueshme dhe marshime në akset kryesore të qytetit, duke artikuluar kërkesa të qarta: dorëheqjen e kryeministrit Edi Rama, garantimin e zgjedhjeve të lira dhe vendosjen e një standardi të ri në mënyrën e qeverisjes së vendit.

Në tubimin e një dite më parë, aktivistët ritheksuan vendosmërinë për të vijuar protestën pa ndërprerje. Ata e konsideruan këtë periudhë si një provë të fortë të qëndresës qytetare, duke deklaruar se mobilizimi do të vazhdojë deri në përmbushjen e objektivave të shpallura.

Si çdo mbrëmje, edhe dje protesta u pasua nga marshimi në rrugët kryesore të Tiranës, ku nuk munguan thirrjet simbolike si “Rama ik”, “Dorëheqje”, “Shqipëri e re” dhe “Revolucion”, që tashmë janë kthyer në slogane identifikuese të kësaj lëvizjeje.

Edhe për sot, organizatorët kanë paralajmëruar të njëjtin skenar: fillimisht tubim para Kryeministrisë me fjalime nga qytetarë dhe aktivistë, e më pas marshim në disa prej akseve kryesore të kryeqytetit. Sipas tyre, protesta do të vijojë çdo ditë pa ndërprerje, derisa të arrihen kërkesat për largimin e qeverisë dhe ndryshimin e klasës politike në vend.