Fermerët e Myzeqesë në krizë nga dëmet pas përmbytjeve

Fermerët e Myzeqe po përballen këtë fillimviti me dëme të paprecedenta në kulturat bujqësore. Përmbytjet e fundit kanë shkaktuar humbje të konsiderueshme në tokat bujqësore, ndërsa ngricat e ditëve të para të vitit kanë goditur rëndë prodhimin edhe në parcelat që i shpëtuan ujit.

Një nga fermerët më të prekur është Fatjon Asllani, nga Zharrëz, i cili është detyruar të asgjësojë të gjithë prodhimin e domateve në sera, pasi ngricat e forta e kanë bërë të pamundur shpëtimin e kulturave.

Situata problematike raportohet edhe në Frakull, ku fermerët që kultivojnë luleshtrydhe dhe tranguj në sera kanë pësuar dëme të mëdha, duke rrezikuar seriozisht vazhdimësinë e aktivitetit të tyre bujqësor.

Fermerët e zonës shprehen të alarmuar dhe kërkojnë ndërhyrje urgjente nga shteti, si në drejtim të mbështetjes financiare, ashtu edhe për ndihmë në rimëkëmbjen e aktivitetit bujqësor dhe rimbjelljen e tokave të dëmtuara, duke paralajmëruar se pa ndihmë institucionale, sezoni bujqësor rrezikon të dështojë që në fillim.