Filmimi i automjeteve të Diasporës nga policia ngre pikëpyetje

Vetëm pak para nisjes së protestës së 35-të qytetare në Tiranë, disa pamje të publikuara në rrjet kanë ndezur debat dhe kanë shtuar dyshimet mbi veprimet e autoriteteve në terren.

Në pamje shfaqet një efektiv i Policisë së Shtetit teksa filmon automjetet e një autokolone të përbërë nga pjesëtarë të Diasporës. Mjetet lëviznin në rrugët e kryeqytetit të shoqëruara me flamuj kuqezi dhe sinjale zanore, ndërsa i drejtoheshin zonës qendrore ku pritet të zhvillohet tubimi.

Ky zhvillim ka rikthyer shqetësimet e ngritura edhe disa ditë më parë, kur pas protestës së fundit, dhjetëra qytetarë nga Diaspora deklaruan se ishin ndëshkuar me gjoba për “pengim të qarkullimit rrugor”. Disa prej tyre raportuan gjithashtu vështirësi në kalimin e pikës kufitare të Muriqanit, për shkak të penaliteteve të papaguara.

Publikimi i pamjeve të fundit ka shtuar dyshimet se një praktikë e ngjashme mund të jetë duke u përsëritur. Qytetarët kërkojnë qartësi nëse filmimi i targave lidhet me evidentimin e shkeljeve konkrete të Kodit Rrugor apo nëse mund të pasohet me masa administrative ndaj pjesëmarrësve në protestë.

Deri më tani, Policia e Shtetit nuk ka dhënë një reagim zyrtar mbi arsyet e filmimit të autokolonës së Diasporës.

Ndërkohë, zhvillimet pritet të ndiqen nga afër, ndërsa vëmendja mbetet te mënyra se si do të menaxhohet protesta dhe çdo masë e mundshme ndaj qytetarëve që kanë udhëtuar nga jashtë për t’iu bashkuar tubimit.