FOTO-VIDEO/ Po shkonte në punë, si vdiq në aksident punonjësi i Burgut

Aksidenti i rëndë mësohet se ka ndodhur pranë fshatit Spiten, ku janë përfshirë tri automjete. Në një prej makinave të aksidentuara po udhëtonte Arjan Bejtja, 37 vjeç, banues në Shëngjin.

Përplasja rezultoi fatale për 37-vjeçarin, që mësohet se është punonjës i Burgut të Shënkollit në Lezhë. Gjithashtu, nga ky aksident i rëndë kanë mbetur të plagosur dhe tre persona të tjerë.

I riu që mbante detyrën e shefit të Regjimit të Brendshëm në Burgun e Shënkollit ka lënë pas dy fëmijë, një vajzë dhe një djalë. Bejtja mësohet se në momentin e aksidentit ishte duke udhëtuar për në punë.

“Në autostradën Lezhë-Laç, në vendin e quajtur kryqëzimi i Spitenit, mjeti me drejtues shtetasin Z.Sh., banues në Laç, është përplasur me mjetin me drejtues shtetasin A.B.,37 vjeç, banues në Lezhë, i cili për pasojë ka humbur jetën. Grupi hetimor vazhdon veprimet në vendngjarje për sqarimin e rrethanave të aksidentit”, bëhet e ditur nga Policia.