Frika nga sulmet e Iranit, Aeroporti i Tiranës merr vendimin urgjent

Aeroporti Ndërkombëtar i Tiranës ka njoftuar zyrtarisht se janë ndërprerë përkohësisht fluturimet drejt Tel Aviv dhe Dubai.

Sipas njoftimit të aeroportit, vendimi është marrë për arsye sigurie dhe lidhet drejtpërdrejt me situatën e tensionuar në Lindjen e Mesme, si dhe me mbylljen e hapësirave ajrore në disa zona të rajonit. Pezullimi i fluturimeve do të mbetet në fuqi deri në një njoftim të dytë.

Autoritetet aeroportuale u kanë bërë thirrje të gjithë pasagjerëve që kanë planifikuar udhëtime drejt këtyre destinacioneve të kontaktojnë kompanitë ajrore përkatëse për të marrë informacion të përditësuar mbi rezervimet, rimbursimet apo alternativat e mundshme të udhëtimit. Sipas TIA-s, çdo zhvillim i ri lidhur me rifillimin e fluturimeve do të bëhet publik menjëherë sapo situata të qartësohet.

Vendimi vjen në një moment kur tensionet mes Izrael dhe Iran janë rritur ndjeshëm, duke krijuar shqetësim për sigurinë e trafikut ajror në rajon.

Fluturimet direkte mes Tiranës dhe Tel Avivit u vendosën vetëm vitin e kaluar, si rezultat i rritjes së kërkesës për udhëtime mes dy vendeve. Në vitet e fundit, Shqipëria është kthyer gjithnjë e më shumë në një destinacion të preferuar për turistët izraelitë.

Megjithatë, përshkallëzimi i fundit i konfliktit në rajon pritet të ndikojë përkohësisht në këtë fluks turistik dhe në lëvizjet ajrore mes vendeve.