Dashnor Sula vijon me lavdet për Edi Ramën

Ish-deputeti i Partisë Demokratike, Dashnor Sula, ka dhënë intervistën e tij të parë pas emërimit në detyrën e Kryeinspektorit të Përgjithshëm, duke sqaruar arsyet që e shtynë të pranojë ftesën e kryeministrit Edi Rama dhe duke komentuar reagimet e ardhura nga kreu i PD-së, Sali Berisha.

Sula rrëfeu se vendimi për të pranuar detyrën nuk ka qenë i lehtë, por sipas tij, pas largimit nga strukturat politike të PD-së nuk shihte më hapësirë për të kontribuar brenda saj.

Ai theksoi se ftesa e kryeministrit erdhi si një sfidë për të marrë pjesë në ndërtimin e një institucioni të rëndësishëm shtetëror, ndërsa shtoi se tashmë e konsideron veten në rolin e një nëpunësi publik dhe jo më si politikan aktiv.

Sula pranoi se fillimisht kishte dilema për pranimin e detyrës, sidomos për shkak të perceptimit që mund të krijohej nga ish-bashkëpunëtorët e tij politikë. Megjithatë, ai u shpreh se detyra e re duhet parë si shërbim ndaj të gjithë qytetarëve, pavarësisht bindjeve politike, duke theksuar se “kostumin e politikanit” e ka lënë pas.

Në intervistën për gazetaren Rudina Muça, ish-deputeti demokrat vlerësoi gjithashtu një veçori të kryeministrit Rama, duke thënë se gjatë karrierës politike nuk ka parë që ai të sulmojë familjet e kundërshtarëve politikë, një sjellje që, sipas Sulës, duhet të jetë standard në politikë.

Sa i përket reagimeve të kreut të PD-së pas emërimit të tij, Sula zgjodhi të mos japë komente, duke theksuar se nuk e konsideron të moralshme të vijojë polemikat politike në funksionin e ri institucional.

Në lidhje me sfidat e detyrës së Kryeinspektorit të Përgjithshëm, ai u shpreh se prioritet kryesor do të jetë modernizimi dhe digjitalizimi i sistemit të inspektimeve, me synimin për të krijuar një strukturë më efikase dhe transparente brenda këtij viti.

Gazetarja: Zoti. Sula ju vini nga një karrierë e gjatë politike 20 vite në logon e PD, nga një zë kritikues tashmë do të jeni bashkëpunëtor me mazhorancën. Si e pranuat ftesën e Kryeministrit Edi Rama?

Dashnor Sula: Dhunshëm u përzura dhe nuk kisha asnjë të ardhme që të përfshihesha për të dhënë këtë kontribut. Z.Rama më hodhi dorashkën dhe më paraqiti sfidën për të marrë pjesë në ndërtimin e një institucioni të shtetit shqiptar.

Gazetarja: A patët dilema për të pranuar detyrën e Kryeinspektorit pasi me reformën e re ju do të keni 17 inspektoriate për të menaxhuar. A mendoni se do të quheni tradhtar nga pala tjetër?

Dashnor Sula:  Fillimisht e kisha të vështirë. Por më ka thënë z.Rama se qytetarët shqiptarë nuk janë vetëm socialistët, qytetarët shqiptarë janë edhe ata me bindje të tjera e demokratike. Dhe kostumin e politikanit unë e kam lënë në shtëpi dhe kam veshur kostumin e një nënpunësi të shtetit.

Gazetarja: Si ndodhi afrimi me Edi Ramën, pasi ju keni qenë kritikues ndaj njëri-tjetrit për një kohë të gjatë në Parlament?

Dashnor Sula: Unë kam konstatuar një veçori dhe atë e ka Edi Rama dhe rrallë një politikan tjetër në Shqipëri. Nëse do të gjeni një moment të vetëm që z.Rama është një person që i hyn në familje të politikanit tjetër. Nuk ka. Këtë cilësi e kam pas dhe unë në politikë.

Gazetarja: A mendoni që e tepruat kur thatë që e vlerësoni vizionin e Ramës?

Dashnor Sula: Nuk mund të mohohet që Edi Rama ka sfidë të fusë Shqipërinë në BE.

Gazetarja: Po reagimin e Berishës si e pritët ?

Dashnor Sula: Nuk do ja lejoja vetes dhe nuk do të ishte e moralshme që të vazhdoj të bëj komente politike.

Gazetraja: Tashmë ju keni marrë detyrën e Kryeinpektorit, cilat janë sfidat që ju janë caktuar?

Dashnor Sula: Të shkëputemi nga modeli që ka qenë përgjatë këtyre 35 viteve dhe shpresoj se deri në fund të vitit të kemi një sistem të digjitalizuar.