GJKKO dënon me 6 vite burg Pëllumb Gjokën

Gjykata e Posaçme ka shpallur fajtor dhe ka dënuar me 6 vite burgim biznesmenin Pëllumb Gjoka, ndaj të cilit rëndojnë disa akuza të rënda penale, përfshirë krijimin e kushteve për të kryer vrasje, pjesëmarrje në grup kriminal dhe korrupsion.

Vendimi përfundimtar u dha pas shqyrtimit të provave dhe dëshmive në kuadër të këtij procesi, ndërsa për akuzën e armëmbajtjes pa leje, Gjoka u shpall i pafajshëm.

Në të njëjtën çështje, ish-oficeri i policisë Ardit Hasanbegaj u dënua me 5 vite burgim, duke u konsideruar gjithashtu përgjegjës për veprimtarinë kriminale për të cilën u hetuan.

Të dy të dënuarit ishin arrestuar në kuadër të operacionit të koduar “Metamorfoza”, një aksion i gjerë i autoriteteve kundër krimit të organizuar.

Ndërkohë, Gjoka dhe anëtarë të grupit kriminal Bajri vijojnë të përballen me drejtësinë në një proces të veçantë, ku po gjykohen me procedurë të zakonshme për akuzën e vrasjes së Gjin Ndojit, ngjarje e ndodhur në vitin 2020 në Vaun e Dejës.

Çështja mbetet një nga më të rëndësishmet në luftën kundër krimit të organizuar në vend, ndërsa autoritetet kanë theksuar angazhimin për ndjekjen dhe dënimin e grupeve kriminale.