Gjykata e Vlorës lë në burg “Visin e Garave”

Gjykata e Vlorës ka zhvilluar sot seancën për caktimin e masës së sigurisë ndaj 40-vjeçarit Elvis Kosova, i njohur ndryshe si “Visi i Garave”.

Pas shqyrtimit të kërkesës së Prokurorisë dhe provave të paraqitura gjatë seancës, gjyqtari Nertil Meçaj ka vendosur të lërë në fuqi masën e sigurisë “arrest në burg” për 40-vjeçarin.

Kosova përballet me akuza që lidhen me dhunën në familje dhe kanosjen me armë zjarri. Sipas të dhënave të bëra publike nga Policia, 40-vjeçari dyshohet se ka dhunuar bashkëshorten dhe më pas e ka kërcënuar atë me armë.

Vendimi i Gjykatës së Vlorës është marrë pas vlerësimit të materialeve të mbledhura nga organi i akuzës dhe rrethanave të paraqitura në seancën gjyqësore.

Elvis Kosova, i njohur në publik me nofkën “Visi i Garave”, do të qëndrojë në paraburgim ndërsa hetimet për ngjarjen vijojnë.