Grabitet me armë banka në mes të Tiranës

Një alarm për grabitje me armë ka vënë në lëvizje Policinë e Shtetit në kryeqytet gjatë orëve të fundit. Sipas burimeve paraprake, uniformat blu kanë marrë një telefonatë që njoftonte për një grabitje në një bankë të nivelit të dytë në Tiranë dhe janë nisur menjëherë drejt vendngjarjes për verifikim dhe sigurimin e zonës.

Ngjarja dyshohet se ka ndodhur pranë zonës së ish-Parkut, në afërsi të rrugës “Muhedin Llagami”. Pas mbërritjes në vendin e raportuar, policia ka ndërhyrë dhe ka arritur të neutralizojë autorin e dyshuar.

Sipas informacioneve fillestare, personi i dyshuar ka hyrë në ambientet e bankës i armatosur me një armë automatike tip kallashnikov, duke tentuar grabitjen. Ai është vënë në pranga nga forcat e rendit dhe po shoqërohet drejt komisariatit për veprime të mëtejshme procedurale.

Në vendngjarje ka mbërritur edhe një ambulancë për çdo eventualitet, por deri në këto momente nuk raportohet për persona të lënduar. Autoritetet pritet të japin një njoftim zyrtar për të sqaruar plotësisht rrethanat, motivet dhe dinamikën e kësaj ngjarjeje.