Gruaja e divorcuar u vra me kallash në sytë e vajzës, ja çfarë bëri pas ngjarjes babai i 40-vjeçares

Një ngjarje e rëndë u regjistrua pasditen e djeshme në fshatin Nënshat të Bashkisë së Vau Dejës. Shtetasja Gjuliana Topalli, 40 vjeçe, mbeti e vrarë nga ish-bashkëjetuesi i saj, shtetasi Niko Hila, rreth 50 vjeç. Policia e Shkodrës bën të ditur se ngjarja në Nënshat të Vau Dejësit ndodhi rreth orës 16:44 të ditës së diel. Mësohet se Hila ka qëlluar me armën e zjarrit automatik kallashnikov ish-bashkëjetuesen.

Më pas, 50-vjeçari ka qëlluar veten e tij me plumb në gojë duke mbetur i plagosur rëndë. Pas këtij momenti, ai është dërguar me urgjencë në Spitalin Rajonal të Shkodrës në gjendje të rëndë shëndetësore. Pasi ka marrë ndihmën e parë, autori i dyshuar është dërguar drejt Spitalit të Traumës në Tiranë për mjekim më të specializuar. Policia ka bërë ndalimin e autorit të dyshuar në kushte spitalore. Në vendngjarje kanë mbërritur forca të shumta policie duke nisur hetimet mbi këtë vrasje.

“Më datë 09.01.2022, rreth orës 16:44, në fshatin Nenshat, Bashkia Vau i Dejës, në rrethana ende të paqarta shtetasi N. H., rreth 50 vjeç, dyshohet se ka vrarë me armë zjarri ish-bashkëjetuesen e tij, shtetasen Gj. T., 40 vjeçe. Shtetasi N.H pas krimit dyshohet se ka tentuar të vrasë veten dhe për pasojë ka mbetur i plagosur dhe ndodhet nën kujdesin e mjekëve në Spitalin Rajonal Shkodër. Grupi hetimor po vijon punën për sqarimin e rrethanave dhe zbardhjen e ngjarjes”, bëri me dije Policia.

DIVORCI

Sipas burimeve, çifti kishte disa kohë që ishte divorcuar, të paktën rreth një vit, dhe pasditen e djeshme pas një debati mes tyre ka përfunduar me ngjarjen tragjike ku 40-vjeçarja Gjuliana Topalli u qëllua për vdekje nga ish-bashkëshorti.

Ngjarja e rëndë ndodhi në afërsi të banesës ku jetonte viktima. I pranishëm ka qenë edhe babai i 40-vjeçares Topalli dhe vajza e saj e mitur vetëm 4 vjeçe. Pasi autori i dyshuar ka qëlluar, babai i 40- vjeçares ka dalë, por nuk ka arritur që të bëjë diçka për të parandaluar ngjarjen e rëndë. Vajza ndërroi jetë në duart e tij, ndërsa një traumë ka pësuar edhe vajza e mitur e viktimës, e cila qëlloi në shtëpi.

Policia e Shkodrës tashmë është duke marrë në pyetje edhe dëshmitarë të ndryshëm që kanë qenë në vendngjarje, mes të cilëve edhe babain e 40-vjeçares, i cili e ka pasur të vështirë për të folur për shkak të gjendjes së rëndë psikike pas vrasjes së vajzës së tij, e cila ndërroi jetë në duart e tij dhe në praninë e mbesës. Po ashtu, po merren në pyetje edhe dëshmitarë të tjerë apo persona që mund të kenë pasur dijeni për konfliktin mes autorit të dyshuar Niko Hila dhe viktima Gjuliana Topalli.