Heronjt tanë me bukë e djathë dhe 20 orë mes flakëve

Për rreth 20 orë, zjarrfikësit e Patosit kanë luftuar pa pushim me flakët, mes temperaturave të larta, tymit dhe lodhjes, për të mbrojtur jetën e qytetarëve dhe pronat e tyre.

Pas orësh të tëra në terren, një pushim i shkurtër. Pak bukë dhe djathë për të marrë energji dhe përsëri drejt zjarrit.

As tavolina, as rehati, as luks. Bukë, djathë dhe shumë zemër.

Këta janë njerëzit që hyjnë aty ku të tjerët largohen. Rrezikojnë veten për të shpëtuar të tjerët dhe, kur situata bëhet emergjente, harrojnë orarin, lodhjen dhe nevojat e tyre.

Njëzet orë përballë flakëve nuk janë një turn i zakonshëm pune. Janë një sakrificë e jashtëzakonshme fizike dhe njerëzore.

Dhe përballë këtyre pamjeve mbetet një pyetje që nuk mund të shuhet bashkë me zjarrin: A kanë këta zjarrfikës pajisjet, mbështetjen dhe vlerësimin që meritojnë?