Heshtja zgjedhore, 334 mijë qytetarë nesër drejt kutive të votimit

Të dielën, më 9 nëntor, mbi 334 mijë qytetarë do t’u drejtohen kutive të votimit në pesë bashki të vendit për të zgjedhur kryebashkiakët e rinj.

Procesi zgjedhor do të zhvillohet në Vlorë, Berat, Cërrik, Mat dhe Tepelenë, ku Komisioni Qendror i Zgjedhjeve (KQZ) ka shpërndarë tashmë të gjitha materialet zgjedhore nëpër qendrat e votimit.

Masat e sigurisë

Për mbarëvajtjen e procesit, Policia e Shtetit ka hartuar një plan të detajuar masash.

Në pesë bashkitë ku do të zhvillohen zgjedhjet, policia ka marrë në ruajtje 9 objekte zgjedhore ku janë vendosur komisionet e KZAZ-ve dhe 473 qendra votimi në total.

Rreth 612 efektivë policie do të angazhohen për ruajtjen e rendit, sigurinë e materialeve zgjedhore dhe shoqërimin e kutive pas votimit.
Policia u bën apel qytetarëve të denoncojnë çdo rast të tentativave për blerje apo tjetërësim vote.

Një fushatë e pazakontë

Kjo garë është cilësuar si fushata më jo tipike e viteve të fundit, pasi mungoi totalisht protagonizmi politik. As kryeministri Edi Rama dhe as ish-kryeministri Sali Berisha nuk janë shfaqur në asnjë miting apo takim elektoral.

Kandidatët kanë zhvilluar fushata të qeta, të fokusuara kryesisht në takime me komunitetet lokale dhe prezantimin e projekteve konkrete për qytetin.

Sa qytetarë votojnë në secilën bashki

• Vlorë: rreth 172,000 votues

• Berat: mbi 82,000 votues

• Cërrik: afro 39,000 votues

• Mat: rreth 29,000 votues

• Tepelenë: mbi 12,600 votues

Në total, 334,539 qytetarë kanë të drejtë vote.

Kandidatët në garë

Opozita zyrtare nuk ka paraqitur kandidatë nën siglën e Partisë Demokratike, por ka shpallur mbështetjen për disa kandidatë të pavarur, të cilët do të përballen me kandidatët e Partisë Socialiste dhe disa përfaqësues të partive të vogla.

• Vlorë:

  • Brunilda Mersini (PS) – ish-deputete, kandidate për kryebashkiake

  • Dionis Sota – kandidat i mbështetur nga PD

  • Gjergj Nika – anëtar i Këshillit Bashkiak, garon si i pavarur

• Berat:

  • Ervin Ceca (PS)

  • Pavlo Shkarpa – kandidat i pavarur

• Mat:

  • Altin Bojni (PS)

  • Suzana Pasha – ish-kryetare e Gruas Socialiste në Mat, kandidate e pavarur

  • Eduart Brahilika – i mbështetur nga PD dhe opozita

• Cërrik:

  • Florenc Doka (PS)

  • Amarildo Hoxha – i pavarur, me mbështetjen e PD

  • Eligert Hima – nën siglën e partisë “Lëvizja Shqipëria Bëhet”

• Tepelenë:

  • Gramoz Sako (PS)

  • Gabriel Guma – kandidat i pavarur, i mbështetur nga opozita

Kryebashkiakët që do të zgjidhen të dielën do të kenë mandat njëvjeçar e gjysmë, deri në zgjedhjet vendore të pranverës 2027.