Incidenti i rëndë: Turistët izraelitë helmohen në “Hotel Vlora Priam”

Dhjetëra turistë izraelitë që po qëndronin në një hotel në Vlorë përfunduan në spital pas një episodi të dyshuar helmimi, duke shfaqur simptoma të forta si të vjella, dridhje trupore, konfuzion dhe humbje ndjenjash.

Ngjarja është raportuar nga mediat izraelite, të cilat kanë ngritur shqetësime për mënyrën e reagimit të hotelit dhe autoriteteve shqiptare. Disa prej turistëve dyshojnë se shkaku mund të ketë qenë një rrjedhje gazi nga sistemi i kondicionimit, megjithëse kjo mbetet e pakonfirmuar zyrtarisht.

Sipas dëshmisë së një turisteje, simptomat nisën papritur gjatë natës dhe u përkeqësuan brenda pak minutash, duke bërë që disa persona të mos arrinin të lëviznin apo të qëndronin në këmbë. Disa prej tyre madje humbën ndjenjat, ndërsa jashtë dhomave u panë ambulanca dhe turistë të tjerë në gjendje të rënduar.

Pushuesit kanë kritikuar reagimin fillestar të ndihmës së shpejtë, duke pretenduar se nuk u transportuan menjëherë në spital dhe nuk iu kryen kontrolle bazike mjekësore në kohë. Vetëm pas përkeqësimit të gjendjes, ata u dërguan për trajtim më të specializuar.

Në spital, turistët raportojnë se kanë hasur edhe persona të tjerë me simptoma të ngjashme, ndërsa shpjegimet e para kanë qenë të paqarta, duke përfshirë mundësi si infeksione apo gjendje ankthi.

Disa prej të prekurve besojnë se mund të ketë pasur një rrjedhje azoti nga sistemi i ajrimit, bazuar në simptomat dhe rrëfime të tjera nga persona që kishin ndjerë erë të pazakontë para se të humbnin ndjenjat.

Pas incidentit, turistët pretendojnë se nuk kanë marrë mbështetje apo sqarime nga stafi drejtues i hotelit dhe ndihen të braktisur. Disa prej tyre kanë bërë kallëzim dhe kanë kërkuar hetim të plotë për zbardhjen e ngjarjes.

Deri më tani, nuk ka një konfirmim zyrtar për shkakun e incidentit dhe autoritetet shqiptare nuk kanë publikuar ende një raport përfundimtar.