Intelektualët e Far West-it

Klodian Tomorri | Opinion | Publik.al

Sa herë ndodh ndonjë ngjarje e rëndë, vërshojnë idetë gjeniale. E fundit është kjo: t’u jepen armë gjyqtarëve  dhe u gjet zgjidhja e problemit.

Domethënë, kur të shkojë gjyqtari në sallën e gjyqit, do të nxjerrë patllakën mbi tavolinë, e heq nga siguria, ja drejton palës humbëse dhe fillon të lexojë vendimin.

“Në bazë të nenit kaq e aq, gjykata vendosi të shpallë fajtor (mos lëviz se ta futa plumbin), shtetasin X, duke e dënuar me kaq vite.”

Po mirë, pse t’u ndalohet gjyqtarëve kjo punë? T’u japim armë edhe mjekëve, se mund t’u vrasin familjarët e pacientëve. Pastaj t’u japim armë edhe pedagogëve, se pala mund t’i vrasë ndonjë student që ngel. Gazetarëve po, edhe atyre. Por edhe punonjësve të bashkisë që fshijnë rrugët e qytetit, se e kanë punën natën dhe janë të rrezikuar.

Të gjithë me armë. Ta bëjmë “Far West” këtu dhe pastaj fillojmë të luajmë lojën e luftës me njëri-tjetrin. Hajde, hajde.

Pse, kështu zgjidhet kjo? Këta nuk merren me problemin. Dhe problemi këtu është para syve të të gjithëve: shteti është i kalbur në çdo qelizë.

Është aq i kalbur, sa e çon qytetarin me shpatulla pas muri, duke e nxitur të hedhë poshtë jetën e tij dhe të bëjë krim duke marrë jetën e një zyrtari. Aq i kalbur sa nuk i garanton dot sigurinë një zyrtari në detyrë. Dhe aq i papërgjegjshëm sa, kur ndodh hataja, del e shfajësohet: “Nuk është përgjegjësi e imja.”

Problemi është të ndërtojësh një shtet ku armët nuk i duhen askujt dhe janë monopol i shtetit në funksion të ligjit. Sepse varianti tjetër, ku gjithkush mban armë për të mbrojtur veten, e nxjerr qeverinë dhe shtetin të panevojshëm.

Për çfarë duhet qeveria pastaj? Për të vjedhur tenderat?

Tani, si bëhet një vend ku arma është e panevojshme? Me ligj. Vetëm me ligj. Populli mandaton qeverinë dhe institucionet që të garantojnë rendin dhe sigurinë publike.

Kur ato nuk e bëjnë këtë, atëherë ka vetëm një zgjidhje. Kur ke dhëmb të kalbur në gojë, shkon ta heqësh tek dentisti  nuk kërkon sodën e bukës te komshiu për dhimbjet.